सशस्त्र प्रहरी बलले संयुक्त राष्ट्रसंघीय मिसनमा पुर्याएको योगदानले दक्षिण सुडानमा तैनाथ हुने गरी हालै मात्र १४० जना संख्याको एउटा अर्को फर्म्ड पुलिस युनिट मिसन थप भएको छ।
यसअघि गत वर्ष मात्रै सशस्त्र प्रहरी बलले नयाँ मिसनको रुपमा १४० जना संख्याको एफपीयु मिसन लाइवेरियाको डुम्वनवर्गमा थप तैनाथ हुने गरी परिचालन गरेको थियो।
सशस्त्र प्रहरी बलले लाइवेरियामा शान्ति स्थापनार्थ उत्कृष्ट योगदान पुर्याएपछि संयुक्त राष्ट्रसंघको अनुरोधमा लाइवेरियाको बुकानन्मा रहेको १२० जनाको टोलीलाई 'इन्टर मिसन कोअपरेशन' को अवधारणा अनुरुप सुडानमा तैनाथ गरिएको थियो।
सो टोलीको संख्यामा उक्त मिसनले थप ६० जना संख्याको 'फिमेल रोवष्ट इलिमेन्ट' थप गरेपछि सशस्त्र प्रहरी बलबाट एफपीयु मिसनमा शान्ति स्थापनार्थ सुडानमा तैनाथ सशस्त्र प्रहरी कर्मचारीको संख्या ३२० पुगेको छ भने एफपीयुकै रुपमा लाइवेरियामै कार्यरत २६० जना गरी चारवटा एफपीयु मिसनमा कूल संख्या ५८० जना पुगेको छ
।
सशस्त्र प्रहरी बलको स्थापना लगत्तै २०५९ साल कार्त्तिक २ गतेबाट सशस्त्र प्रहरी बलले संयुक्त राष्ट्र संघीय मिसनमा सहभागिता जनाएको हो। संगठनभित्र ठूलो अवसरको रुपमा लिइने यस्ता मिसनमा यस वर्षको पाँच महिनाको अवधिमा मात्रै ३८४ जना खटिएका छन् भने गत वर्ष २०७० सालमा कूल ८४० जना खटिएका थिए। यसअघि २०६८ सालमा ५५३ जना मिसनमा खटिएका थिए।
यस्ता मिसनमा खटिने सशस्त्र प्रहरी कर्मचारीहरुका लागि संगठनले ती देशमा गर्नुपर्ने कार्यबारे सिकाउन प्रशिक्षण नै संचालन गर्ने गरेको छ।
संयुक्त राष्ट्र संघको अनुरोधमा लाइवेरिया र दक्षिण सुडानमा खटिई जाने सशस्त्र प्रहरी कर्मचारीका लागि संचालित युएन एफपीयु प्रिडिप्लोयमेन्ट तालिम मंगलबार सम्पन्न भएको छ।
मिसनमा खटिई जाने ४४० जनाका लागि संचालित उक्त तालिमका प्रशिक्षार्थीहरुलाई सम्बोधन गर्दै सशस्त्र प्रहरी महानिरीक्षक कोषराज वन्तले ठूलो संख्यामा मिसनमा सहभागिता हुनु संगठनको लागि गर्वको कुरा भएको उल्लेख गरेका थिए।
उनले बलको मिसन छनोट प्रणालीलाई व्यावशायीक, विश्वसनीय तथा पारदर्शी बनाउन एफपीयु छनोट निर्देशिका अनुरुप छनोट गरिएको बताए।
उनले नागरिकलाई सेवा र सुरक्षा प्रदान गर्न तथा संगठनको उन्नती र प्रगतीका लागि सकारात्मक सोचका साथ सधैं कृयाशिल रहन निर्देशन समेत दिए।
