पहिरोमा परी आफ्ना शाखा सन्तान र भएभरको सम्पत्ति नै गुमाएकी सिन्धुपाल्चोककी एक महिलाले बचेको एउटा औँठी पनि दान गरेकी छन्।
सिन्धुपाल्चोकको जुरेमा हालै गएको पहिरोमा सबै सम्पत्ति र परिवारका नौ सदस्य गुमाएकी ३४ वर्षीया रितु श्रेष्ठले नागको प्रतिमा बनाउन बचेको एउटा सुनको औँठी दान गरेकी हुन्।
सिन्धुपाल्चोकको जुरेलगायत देशका विभिन्न ठाउँमा बाढीपहिरोमा परी मृत्यु भएकाको आत्माको शान्तिको कामना गर्दै काठमाडौँ तीनकुने चौरमा जारी श्रीमद्भागवत सप्ताह ज्ञान महायज्ञस्थलमा श्रेष्ठले आज आफ्नो सुनको औँठी दान गरिन्।
‘२०६८ सालमा त्यहाँ नाग मारेका थिए, मेरा जेठाजु, जेठानी, नन्द, देउरानीसमेत गरेर नौ जना बिते, सम्पत्तिको नाममा भएको सबै घरखेत पनि सुनकोसीले बगायो बचेको यो सुनको औँठी नागको प्रतिमा बनाउनको लागि स्वच्छाले दान गरेँ’–श्रेष्ठले भनिन्।
गत साउन १७ गते नागपञ्चमीको दिन राति भोटेकोसी नदी किनारमा पर्ने जुरेमा पहिरोजाँदा ढाडमा प्वाल परेर श्रेष्ठ पनि घाइते भएकी थिइन्।
आगामी असोज १ गतेसम्म चल्ने महायज्ञमा वाचन प्रविण प्रण्डित दीनबन्धु पोखरेलले कथा वाचन गरिरहेका छन्।रासस
