लुम्बिनी अञ्चल अस्पताल बुटवलका सटरहरुमा व्यवसाय सञ्चालन गर्दै आएका व्यवसायीहरुलाई आन्दोलन छोडी सटर टेण्डर प्रकृयामा सहभागि हुन पत्रकारहरुले सुझाव दिएका छन्।
लामो समयपछि भएपनि सटरहरुको भाडा निर्धारण टेण्डर प्रकृयाबाट हुनु अस्पतालको हितमा हुने भन्दै उनीहरुले त्यस्तो सुझाव दिएका हुन्।
वर्षौसम्म व्यवसाय सञ्चालन गरेका व्यवसायीहरु विस्थापित हुनुपर्छ भन्ने कसैको चाहना नभएपनि टेण्डर प्रकृयाको विरोध गर्नु भने जायज नभएको उनीहरुले बताए।
रुपन्देही व्यापार संघ, रुपन्देही उद्योग संघ र बुटवल उद्योग वाणिज्य संघले संयुक्त रुपमा आयोजना गरेको पत्रकार सम्मेलनमा पत्रकारहरुले व्यवसायीहरु टेण्डर प्रकृयाबाट डराउन नहुने बताएका हुन्।
लुम्विनी अञ्चल अस्पतालको अनियमितता रोक्न सटरहरुलाई टेण्डर प्रक्रियामा लैजानै पर्ने उनिहरुको सुझाव थियो।
अञ्चल अस्पतालका सटर टेण्डरमा नलैजादा अस्पताललाई वार्षिक तीन करोड घाटा भएकाले पनि टेण्डर प्रक्रियामा लैजानै पर्ने सुझाव उनीहरुले दिएका हुन्।
अस्पतालका सटर लाखौंमा खरिद बिक्रि हुने गरेको र सटर ब्यवसायीले नै अस्पतालमा अनियमितता गर्न मलजल गरेकाले टेण्डरमा नगए थप अनियमितता बढ्ने भन्दै यसका विरुद्धमा लविङ नगर्न संघ संस्थाहरुलाई सञ्चारकर्मीहरुले सुझाव दिएका थिए।
सञ्चारकर्मीहरुले सटरको किनबेच रोक्न र अस्पतालको आम्दानीमा झण्डै तीन करोड वृद्धि गर्न पनि टेण्डर प्रक्रिया नै ठीक भएको बताए।
टेण्डर प्रक्रियाले अस्पतालका सटरमा धेरै वर्ष पहिला देखि ब्यवसाय गर्दै आएका विस्थापित हुने भए भन्दैमा नियम कानुनको धज्जी नउडाउन ब्यवसायीलाई सञ्चारकर्मीहरुले सुझाव दिए।
कार्यक्रममा आयोजकहरुले व्यवसायीका पक्षमा र टेण्डरका विरुद्धमा सञ्चारकर्मीहरुको सहयोग जरुरी रहेको बताएपछि सञ्चारकर्मीहरुले टेण्डरको विरोध नगर्न सुझाव दिएका हुन्।
अस्पतालका सटर केही महिना अगाडी मात्रै लाखौंमा विक्रि भएको तथा सटरमा कमिसनका खेल जारी रहेकाले यसपटक खोलिएको टेण्डरलाई अझ पारदर्शी वनाउन र अब सटर लिनेहरुलाई नियममा बाध्नका लागि पनी संघ संस्थालाई पत्रकारहरुले सुझाव दिएका थिए।
सो अवसरमा पत्रकार महासंघ रुपन्देहीका अध्यक्ष्ँ शेर बहादुर केशी, पत्रकारहरु भरत केशी, यमलाल खनाल, दिनेश पाण्डे, दामोदर खनाल, रामप्रसाद आचार्य, विश्वास ढकाल, सुरज भण्डारी, टोपराज शर्मा, रुद्रहरी कुवंर लगायतले व्यवसायीहरुलाई टेण्डर प्रकृृयाको विरोधमा नलागी अस्पतालको स्तरउन्नती तर्फ पनि लाग्न सुझाव दिएका थिए।
सो अवसरमा रुपन्देही व्यापार संघका अध्यक्ष्ँ श्रीकृष्ण पोखरेल, बुटवल उद्योग वाणिज्य संघका अध्यक्ष्ँ सुरेन्द्र श्रेष्ठ, रुपन्देही उद्योग संघका महासचिव विष्णु श्रेष्ठ लगायतले अस्पतालको विकासको बाधक व्यवसायीहरु नभई स्वयं अस्पतालका कर्मचारी र विकास समिती नै रहेको बताएका थिए।
उनीहरुले सरकारले घरबहाल ऐन नल्याउंदा सम्म खरीद ऐन पनि ल्याउन नहुने भन्दै घर बहाल ऐन ल्याएपछि मात्र टेण्डर प्रकृयामा जानुपर्ने बताएका थिए।
अस्पतालका ७२ वटा व्यवसायीक सटरहरुको भाडा रकम अत्यन्त न्यून भएको भन्दै भाद्र १ गते टेण्डर आव्हान गरेको हो।
नेपाल सरकार स्वास्थ्य तथा जनसंख्या मन्त्रालयले अस्पतालको पूर्वतर्फ रहेका सपिङ कम्प्लेस (सटहरहरु) ४ वर्षको लागि भाडामा दिने भन्दै बोलपत्र आव्हान गरेको छ।
व्यवसायी र अस्पतालबीच २०६८ सालमा भएको सम्झौता २०७० साउन १ गतेदेखि सकिएको थियो।
सम्झौता सकिएको १ वर्ष सम्म पनि सम्झौता हुन नसकेपछि यसअघि अख्तियारले सटरको टेण्डर आव्हान नगरे अस्पतालका कार्यालय प्रमुखलाई कारवाही गरिने चेतावनी दिएको थियो।
अस्पतालले सटर भाडावापत वार्षिक १ करोड ११ लाख रुपिया“ आम्दानी गर्दै आएकोमा टेण्डर प्रकृयामा गए ३ करोड भन्दा बढि आम्दानी हुने जनाएको छ।
सटरहरु टेण्डर प्रकृयामा लैजान सके आर्थिक अभावका कारण संचालनमा आउन नसकेको अस्पतालको आईसियू सेवा पनि संचालन गर्न सकिने अस्पताल विकास समितीले दावी गरेको छ।
