अख्तियार दुरुपयोग अनुशन्धान आयोगको क्षेत्रीय कार्यालय हेटौडाले जिल्ला जनस्वास्थ्य कार्यालय पर्सामा गरेको छापामारी फितलो सावित भएको छ। अख्तियार दुरुपयोग अनुशन्धान कार्यालय हेटौडाका अनुसन्धान अधिकृत रेवतीरमण भट्टराईको नेतृत्वमा आएको टोलीले बिहान ११ बजेदेखि कार्यालयमा छापा मारेको थियो।
दुईजना अधिकृतहरुसँग बयान लिएपछि सिरिसियामा रहेको जनस्वास्थ्य कार्यायलको औषधि स्टोरमा छापा मारेको थियो।
स्टोरमा जिल्लाका विभिन्न स्वयम्सेवीकाहरुलाई वितरण गरिने ६९बटा व्यागमा म्याद गुज्रेको औषधि तथा स्वास्थ्य सामाग्रीहरु पाइएको थियो। साथै स्टोरमा म्याद गुज्रेका स्काल्प म्यानसेट,स्वीमोक्स कम्पनीको एमोकस्लीन केप्सुल पाँच कार्टुन बरामद भए पनि टोली प्रमुख भट्टराइले औषधीलाई यथासिघ्र नस्ट गर्न निर्देशन दिएर फर्केका थिए।
जिल्ला जनस्वास्थ्य कार्यालयको स्टारमा पाइएको औषधीहरुको अन्तिम म्याद २०१२ मेदेखि २०१४मेसम्म रहेको छ। पर्सा जिल्ला जन स्वास्थ्या कार्यालय पर्साले म्याद गुज्रेको औषधी खरिद गरेर स्टेारमा राखेको प्रत्यक्ष प्रमाण पाइए पनि अख्तियारको टोलीले वेवास्ता गर्नुको कारण रहस्यपूर्ण रहेको जनस्वास्थ्यको एक कर्मचारीले बताए।
हेटौंडास्थित क्षेत्रिय कार्यालयबाट अधिकृत रेवतीरमण भट्टराईको नेतृत्वमा खटिएको ६ सदस्यीय टोलीले छापामारीमा महत्वपूर्ण कागजात नियन्त्रणमा लिएको जनाएको छ। टोलीले जिल्ला जनस्वास्थ्य कार्यालयको लेखा र स्टोरबाट प्राप्त भएका फाइलहरु नियन्त्रणमा लिएको हो। कार्यालयले विभिन्न कार्यक्रम अन्तर्गतको गरेको खर्च विवरणको फाईल र कागजपत्र आवश्यक अनुसन्धानका लागि नियन्त्रणमा लिइएको आयोगका हेटौडा कार्यालयका प्रमुख हरिराज पन्तले बताए।
वीरगन्ज चिनी कारखाना नजिक रहेको जिल्ला जनस्वास्थ्य कार्यालयमा अख्तियारको टोली पुगेको आधा घण्टापछि बल्ल कार्यालय प्रमुख अरुणकुमार महत्तोसहित तीनजना अधिकृत कार्यालय आइपुगेका थिए। बाँकी कर्मचारीहरु अख्तियारको टोली कार्यालयमा छउन्जेल कार्यालय नै गएनन्।
अख्तियारको छापामारी बारे जिल्ला जनस्वास्थ्य कार्यालय प्रमुखलाई पहिला नै थाहा भएकोले कार्यालयका लेखापाल अनुपस्थित भएका थिए।
आर्थिक वर्ष ०६९/०७० र ०७०/०७१ मा कार्यालयले औषधी खरिद, आमा सुरक्षा कार्यक्रम, पोलियो, स्तनपान, कुष्ठरोग, क्षयरोग, डेंगु रोग नियन्त्रणसम्बन्धी चेतनामूलक कार्यक्रमको शीर्षकमा कार्यालयका कर्मचारीले फर्जी विवरण र कागजात तयार पारी लाखौं रुपैयाँ दुरुपयोग गरेको आरोपसहित परेको उजुरीका आधारमा अख्तियारले उजुरी गरेको हो।
औषधी खरिदमा झण्डै २९ लाख रुपैयाँ अनियमितता भएको सम्बद्ध श्रोतको दाबी छ। कार्यालयमा ३४ वटा शीर्षकमा डेढ करोड रुपैयाँ अनियमितता भएको आशंका गरिएको छ।
जनस्वास्थ्य प्रमुख अरुण महत्तोले कार्यालयले सम्पुर्ण प्रकृया पुर्याएर बजेट खर्चेको दाबी गर्दै दुःख दिने नियतले केही पत्रकारले अख्तियारमा उजुरी गरेको प्रतिकृया दिएका छन्। आव २०७०/७१ मा कार्यालयको चालु खर्च कुल १६ करोड २ लाख ४० हजार रहेकोमा असार मसान्तमा मात्र ४ करोड २९ लाख रुपैयाँ खर्च गरिएको छ।
