पथरीबाट मोरङ प्रहरीले लाखौं नगदसहित २० जना जुवाडेलाई शनिबार नियन्त्रणमा लियो। पथरी गाविस वडा नं. ५ बस्ने जगतबहादुर राईको घरमा जुवा खेलाइरहेको सूचना पाएपछि सादा पोशाकमा पुगेको डीएसपी प्रभु ढकाल नेतृत्वको प्रहरी टोलीले उनीहरूलाई जुवा सञ्चालनार्थ आवश्यक सरसामग्री र सात लाख ६८ हजार ७ सय ९९ रूपैयाँसहित पक्राउ गरेको हो।
पक्राउ पर्ने व्यक्तिमध्ये पेशेवर जुवाडे भनेर चिनिएका उर्लाबारी–६ मंगलबारेका अर्जुन तुम्रुकले अखडा सञ्चालन गरेको प्रहरीले जनाएको छ। भोजपुर, झापा, मोरङ, सुनसरीबाट भेला भएका अन्य पक्राउ व्यक्तिहरूमध्ये इटहरीका विकास केसी तरुण दलका केन्द्रीय सदस्य हुन्।
अन्य पक्राउ पर्ने व्यक्तिहरूमा दमक–१ का दुर्गाप्रसाद राई, तोपगाछी–८ झापाका युवराज रेग्मी, मधुमल्ला–२ मोरङका गौरीमान राई, उर्लाबारी–५ का राम कार्की, धरान–१३ का सुरेन्द्रकुमार थापा, भोजपुर देवानटार–८ का बमबहादुर बस्नेत, पथरी–७ का सोमकुमार राई, लालबहादुर राई, उर्लाबारी–४ का रितिक केसी, धरान–१६ का अमल राई, दमक–१३ का दिलीप पाण्डे, राजघाट–९ मोरङका विक्रम लिम्बू, भोजपर देवानटार–८ का सुमन राई, दमक–१३ का तिलराम पुरी, उर्लाबारी–६ का गोविन्द कार्की, उर्लाबारी–४ का बेलबहादुर कार्की, इटहरा–२ का नवीन कटवाल र पथरीकी सरिता खरेल छन्।
विजयकुमार गच्छदारको पार्टी मधेसी जनअधिकार फोरम लोकतान्त्रिकका केन्द्रीय सदस्य तुम्रुकको व्यवसाय नै जुवा अखडा भएको प्रहरी तथ्यांक बताउँछ। २०६८ सालमा मोरङ प्रहरी प्रमुख प्रद्युम्न कार्की रहँदा तुम्रुक पहिलोपटक समातिएका थिए। दोस्रो संविधानसभा निर्वाचनको समानुपातिकतर्फ लोकतान्त्रिकबाट सूचीमा नाम चढाइएका तुम्रुक यसअघि तीनपटक पक्राउ परिसकेका छन्।
'तुम्रुकको काम नै व्यावसायिक रूपमा जुवा खेलाउने रहेको हाम्रो रेकर्डले बताउँछ,' मोरङ प्रहरीका एसपी विश्वराज पोखरेलले भने, 'कहिले जंगलमा, कहिले गाउँ, कुना काप्चा उनले अखडा थाप्ने गरेका छन्।' केही समयअघि उर्लाबारी–६ स्थित जंगलमै जुवा अखडा सञ्चालन गरिरहेको सूचनाका आधारमा प्रहरी पुग्दा तुम्रुकको टोली फरार भएको थियो।
बरामद भएका सामग्रीमा कौडा १६ थान, पाउडर २ बट्टा, तास १५६ पत्ती, नोकिया मोबाइल १२ थान, सामसुङ मोबाइल ४ थान, आइफोन २ थान लगायत छन्। जुवा खेलिरहेको स्थानबाट करिब पाँच सय मिटर बाटोमा पार्किङ गरिएको को१च ७३२४ नम्बरको स्कोरपियो गाडीसमेत प्रहरीले समातेको छ।
पक्राउ परेका तुम्रुकले आफू पहिलेदेखि नै जुवा खेल्ने गरेको तर यसपटक खालमा नछिरेकै बखत पक्राउ परेको दाबी गरे। 'संविधानसभाको निर्वाचनमा पार्टीमा हिँडेदेखि नै मैले जुवा खेल्न छोडेको थिएँ,' उनले भने, 'पहिले–पहिले लुकिलुकि जुवा खेल्थेँ, भारतको जोगबनीसम्म हाम्रो अखडा बस्थ्यो।'
तुम्रुक आफ्नो टोलीसहित पटक–पटक पक्राउ पर्दा हप्ता या दस दिनमा छुट्ने गरेका छन्। मान्छेको घरबार नै तहसनहस पारिदिने जुवामा कारबाही भने अत्यन्तै कम हुने गरेको छ। यसरी समातिएका व्यक्ति बढीमा पाँच सय रूपैयाँ धरौट जम्मा गरेर प्रशासनबाट छुट्न सक्ने व्यवस्था जुवा ऐनमै छ।
'जुवा ऐन अत्यन्तै कमजोर भएका कारण तुम्रकजस्ता व्यक्ति पक्राउ पर्दै फेरि जुवामा सक्रिय भइहाल्छन्,' मोरङका प्रमुख जिल्ला अधिकारी गणेशराज कार्कीले भने। एसपी पोखरेलका अनुसार तुम्रुकलाई बारम्बार सचेत गराउने गरिएको छ। तर छुटेपछि उनी जुवामै सक्रिय रहने गरेका छन्।
