एक साताअघि मोरङ दर्बेसा गाविसमा एक जना किशोरीमाथि भएको जबरजस्ती करणी सम्बन्धी मुद्दाका ‘मतियार’लाई हिरासतबाट मुक्त गर्न नेपाली कांग्रेस निकट नेपाल विद्यार्थी संघका नेताकार्यकर्ता लागिपरेका छन्। नेपाल विद्यार्थी संघ मोरङ सभापति गोपाल सेढाईंसहित नेताकार्यकर्ता नेविसंघ बल प्रयोग गर्दै प्रहरीमा निरन्तर धाइरहेका छन्।
साउन ३० गते रंगेली नगरपालिका–२ की आदिवासी १४ वर्षीया किशोरीमाथि दर्बेसा–२ स्थित सनपाटबारीमा बलात्कार भएको थियो। रंगेली प्रहरीमा रूँदै जाहेरी दिन पुगेकी ती किशोरीको बलात्कार घटनामा मतियार देखिएका दर्बेसा–२ का नवराज खड्कालाई निर्दोष भन्दै छुटाउन नेविसंघ लागेको हो।
उक्त प्रकरणमा दर्बेसा–२ का सुमन धोवी र रंगेली–२ का दीपेन मण्डललाई मुख्य अभियुक्त किटान गरी प्रहरीले अदालतबाट म्याद थप गरी अनुसन्धान गरिरहेको छ। धोवी र मण्डलले बलात्कार गरिरहँदा गाउँलेले सुइँको पाएपछि यो मुद्दा प्रहरीसम्म पुगेको थियो।
रंगेली प्रहरीका अनुसार किशोरीलाई बलात्कार गर्न भनेर पालो पर्खेर बसेका खड्कालाई मतियारका रूपमा मुद्दा चलाइएको हो। ‘पीडितको जाहेरीअनुसार खड्काले बलात्कार नगरेको भए पनि त्यस घटनामा संलग्न रहेको खुलेको छ,’ इलाका प्रहरी कार्यालय रंगेलीका निरीक्षक नरेन्द्र कुँवरले सेतोपाटीलाई भने, ‘मुख्य अभियुक्त किटान गरिएकामध्ये सुमन धोवीको बयानअनुसार खड्का पालो कुरेर बसेका हुनाले यो घटनामा उनी निर्दोष छैनन्।’
मुद्दा अघि बढाएपछि खड्कालाई छुटाउन स्थानीयसहित नेविसंघ नेता–कार्यकर्ता दुईपटक रंगेली प्रहरीमा ‘डेलिगेसन’ गएका थिए । निरीक्षक कुँवरले खड्का निर्दोष नदेखिएको भन्दै छोड्न नमिल्ने भनेर अडान राखेपछि नेविसंघ नेता जिल्ला प्रहरी धाउन थालेका हुन्।
पहिलो चरणमा कुरा राख्न सेढाईं आफ्ना सहकर्मी लिएर मोरङ प्रहरीका डीएसपी प्रभु ढकाललाई भेट्न गएका थिए। ढकालले उक्त मुद्दा ‘राम्रोसँग हेरिदिने’ आश्वासन दिएको सेढाईंले बताएका छन्।
जिल्ला प्रहरीमार्फत मुद्दा नसल्टिए क्षेत्रीय प्रहरी प्रमुखसँग भेटेर कुरा राख्ने सेढाईंको योजना छ। ‘डीएसपी साहेबले हेरिदिन सकिन्छ भन्नुभएको छ,’ सेढाईंले भने, ‘यहाँबाट भएन भने डीआईजीलाई भेट्न जान्छौं।’
मुलुकी ऐन जबरजस्ती करणी सम्बन्धीको महलमा बलात्कार नगरेकै भए पनि घटनामा मतियार देखिने पनि दोषी नै हुने व्यवस्था विद्यमान छ। सेढाईंले खड्का निर्दोष रहेकाले हिरासतबाट मुक्त हुनुपर्ने भन्दै प्रहरीमा दबाब दिइरहेका छन्।
‘घटनामा संलग्न नरहेको व्यक्तिलाई मुद्दा चलाउन मिल्दैन,’ सेढाईंले भने, ‘छिमेकी भएका कारणले मैले आपत पर्दा सहयोग गर्न खोजेको मात्र हुँ ।’
कानुन व्यवसायीका अनुसार अदालतबाट म्याद थप भइसकेको मुद्दामा अभियुक्त छुट्ने सम्भावनै हुँदैन । तै पनि सरकारी वकिल ‘अनुकुल भइदिए’ अभियुक्त छुट्न सक्छन् ।
‘जाहेरीमा थप प्रमाण बुझ्दै जाँदा दोषी देखिए पुनः पक्राउ गरी मुद्दा चलाउनसक्ने भनेर सरकारी वकिलले तत्कालका लागि निर्दोष देखिएको राय राख्न सक्छन्,’ नेपाल बार एसोसिएसन मोरङ अध्यक्ष डिल्लीबहादुर कार्कीले भने, ‘यस्तो अवस्थामा अभियुक्त छुट्न सक्छन् । सरकारी वकिललाई त्यो अधिकार पनि छ, तर यस्तो मुद्दामा ‘रिस्क’ नलिनुपर्ने हो ।’
जाहेरी नै कमजोर बनेर सरकारी वकिलको कार्यालय पुगे अभियुक्त छुट्न सक्ने सम्भावना प्रसस्तै हुने कानुन व्यवसायीको भनाइ छ ।
तर डीएसपी ढकालले दर्ता भइसकेको मुद्दामा अनुसन्धान भइरहेको अभियुक्त हिरासतबाट छुट्न नसक्ने बताए । ‘सरकारी वकिलले छोडिदिए प्रहरीको केही लाग्दैन,’ ढकालले भने, ‘उहाँहरू आएर छोडिदिन भनेर भन्नुभएको हो, प्रहरीले कानुनअनुसार कारबाही गर्ने हो ।’