सिन्धुपाल्चोकको जुरेमा शनिबार गएको भीषण पहिरोले आफन्त र नातागोता बेपत्ता पारेपछि परिवारका सदस्यहरुले कुशको शव बनाई पशुपति आर्यघाटमा दाहसंस्कार गरेका छन्।
पहिरो गएको चार दिनसम्म पनि परिवारका सदस्य नभेटिएपछि मांखा– १, जुरेका तीन परिवारले मंगलबार दिउँसो पशुपति आर्यघाटमा कुशको शव बनाई १५ जनाको अन्तिम संस्कार गरेका हुन्।
स्थानीय मेघराज पराजुलीसहित उनको परिवारका ५ जना, देउऋषि पराजुलीसहित उनको परिवारका ६ जना र ऋषिराम पौडेलबाहेक उनको परिवारका ४ जना बेपत्ता गरी १५ जनाको कुशको शव बनाएर आर्यघाटमा अन्त्येष्टि गरिएको हो।
उनीहरु भेटिने र जीवित हुनसक्ने संभावना कम भएका कारण कुशको शव बनाएर अन्त्येष्टि गरिएको आफन्तजन रामचन्द्र तिमल्सिनाले सेतोपाटीसँग बताए।
'धेरै खोज्यौ,' बेेपत्ताहरुको शव भेटिएन, चार दिन भयो, कत्ति दिन खोज्ने?' उनले भने, 'शव नभेटिएपछि उनीहरु जिवित भेटिने सम्भावना कम देख्यौं, त्यसैले हिन्दूपराम्परा अनुसार उनीहरुको अन्त्येष्टि गरेका हौं।'
उनका अनुसार पहिरोले मानिसको शव भेटिनु त परै जाओस्, घर भएको अवशेष समेत देखिँदैन। गत शनिबार बिहान तीन बजे गएको पहिरोले मेघराज पराजुली, उनकी पत्नी यज्ञकुमारी, उनकी छोरी स्वस्थानी पौडेल, स्वस्थानीका दुई छोरा सुजन र सुशील तथा मेघराजकी नातिनी सुमितालाई बेपत्ता पारेको थियो।
बुहारी सरस्वती सानो छोरा संस्कार बिरामी भएका कारण बाह्रबिसे गएकाले बाँच्न सफल भएकी छिन्। पराजुलीका दुई छोरा काठमाडौं बस्छन्।
मेघराज परिवारका बेपत्ता सदस्यहरुलाई उनका छोरा गोविन्द र विचारीले कुशको शव बनाई दाहसंस्कार गरेका हुन्।
यसैगरी देउऋषि पराजुलीसहित उनका ५ जना परिवारका सदस्य बेपत्ता भएका थिए। पराजुली दम्पतीसँगै, बुहारी र नातिनी गरी परिवारका ५ जना सदस्य बेपत्ता भएकाले परिवारका सदस्यले उनीहरुको कुशको शव बनाई दाहसंस्कार गरेका हुन्।
पराजुली दम्पती र परिवारका बेपत्ता परिवारका सदस्यलाई उनका छोरा जयराम र विष्णुले कुशको शव बनाई दाहसंस्कार गरेका छन्।
यसैगरी पहिरोले ऋषिराम पौडेलकी श्रीमती, एक छोरा, एक छोरी र भाइ गरी ४ जना बेपत्ता भएका छन्। ऋषिराम भने बाँच्न सफल भए।
पौडल आफैँले बेपत्ताहरुको सम्झनामा कुशको शव बनाई दाहसंस्कार गरे। पहिरोमा कति जना बेपत्ता भए भन्ने कसैसँग आधिकारिक तथ्थांक छैन।
१ सय ५५ जना बेपत्ता भएमध्ये झन्डै ३५ जनाको शव भेटिएको छ। उनीहरुले कुशको शव बनाई आर्यघाटमा दाहसंस्कार गरे पनि अन्यले शव पाइन्छ भन्ने आशमा पहिरोस्थलमा खोजी कार्य जारी राखेका छन्।
'त्यस दिनमात्र होइन, पहिरो पहिला पनि बेलाबेलामा जान्थ्यो, कहिले त दिउँसै झर्थ्यो तर यस्तो कहिल्यै भएको थिएन, म काठमाडौं आएका कारण धन्य बाँचे, परिवारका सबै सदस्यलाई पहिरोले खायो, मरेपछि उनीहरुको अनुहार हेर्न पाइएन,' परिवारका चार सदस्य ऋषिरामले आँखाभरि आँशु झार्दै भने, 'कहाँ बस्ने, के खाने भन्ने समस्याले सताइरहेको छ।'
पहिरोमा परी मृत्यु र बेपत्ता भएका परिवारका आफन्तजनले सरकारले घटनास्थलमा उद्धारकार्य ढिला गरेको, शव खोज्न पहल नगरेको, बाँचेकाहरुलाई व्यवस्थापन गर्न नसकेको भन्दै गुनासो गरेका छन्। 'अहिले जुरेका मानिसहरु कहाँ बस्छन्, के खान्छन्, सरकारले केही ध्यान दिएको छैन,' आफन्त गुमाएका कृष्ण पौडेलले भने, 'सरकार लाचार बनेर बसिरहेको छ।'
उनले एक लाख रुपैयाँ रुपैयाँ खर्च गरेर बहिनी सरस्वती पराजुली र भान्जालाई माउन्टेन एयरको हेलिकप्टरबाट आइतबार उद्धार गरेको बताए। उनले बहिनीको परिवारका पाँच जना सदस्य पहिरोमा परी बेपत्ता भएको जानकारी दिए।
'एउटा नेता बिरामी भए राज्यले करोडौं खर्च गर्छ, पहिरो पीडितलाई उद्धार, उपचार र व्यवस्थापन गर्न रकम दिन सरकार हिच्किचाउँछ,' उनले भने।
