चोरी शिकार, बासस्थानको बिनाश तथा आहारा र पानीको कमीका कारण संसारबाटै बाघको संख्या घट्दै गएको समयमा बर्दिया राष्ट्रिय निकुन्जमा भने बाघको संख्या बढेको छ।
पछिल्लो तथ्यांकअनुसार बर्दिया राष्ट्रिय निकुन्जमा ५० वटा बयस्क बाघ रहेका छन्। सन् २०११ मा गरिएको गणना अनुसार १५ भाले र २२ पोथी गरी ३७ वटा बयस्क बाघ रहेकोमा पछिल्लोपटक सन् २०१३ मा गरिएको गणनामा बर्दिया निकुञ्जमा बाघको संख्या बढेर ५० पुगेको हो।
सरकारले वन्यजन्तु आरक्ष वरपर मध्यवर्ती क्षेत्र घोषणा गरेरे समुदायलाई संरक्षणमा सकृय गराउने अभियान चलाएका कारण बर्दिया राष्ट्रिय निकुन्जमा बाघको संख्या बढेको बर्दिया राष्ट्रिय निकुन्जका निमित्त संरक्षण प्रमुख पुरुषोत्तम शर्माले जानकारी दिए । यस्तै चोरी शिकार नियन्त्रणमा युवाहरुको सकृयता बढेका कारण पनि बाघ संरक्षणमा टेवा पुगेको उनले बताए।
विश्व बाघ दिवसको अवसरमा मंगलबार निकुन्ज कार्यालयमा आयोजित कार्यक्रममा निमित्त संरक्षण प्रमुख शर्माले आहाराको खोजीमा बाघ मानववस्तीमा पस्दा समुदाय र बाघबीच द्धन्द्धको स्थिति सिर्जना हुने र बाघ मारिने गरेकोले बाघ संरक्षणका लागि समुदायको सहभागिता अपरिहार्य रहेको बताए।
दिवसको अवसरमा चोरी शिकार नियन्त्रण युवा परिचालन अभियान समन्वय उपसमिति ठाकुरद्धाराले बर्दिया राष्ट्रिय निकुन्ज र राष्ट्रिय प्रकृति संरक्षण कोषको सहयोगमा बाघ संरक्षण सम्बन्धी सचेतना कार्यक्रमको समेत आयोजना गरेको छ। बाघ संरक्षण सम्बन्धी गीत, गजल, कविता, निवन्ध, वक्तृत्वकला लगायतका प्रतियोगिता समेत गरिएको अभियानका अध्यक्ष हेमन्त आचार्यले जानकारी दिए।
बाघको छाला, हाड, मासु, दाँत र नंग्रा महंगोका बिक्री हुने भएकाले चोरी शिकारी बढेको निकुन्ज कार्यालयले जनाएको छ। संसारबाट घट्दै गएको बाघको संरक्षण तथा संख्या वृद्धिका लागि सहयोग पुर्याउने उद्देश्य सहित हरेक वर्ष जुलाई २९ मा बाघ संरक्षण दिवस मनाउने गरिएको छ।
बाघको संरक्षणका लागि निकुन्ज र वन्यजन्तु आरक्ष वरपर मध्यवर्ती क्षेत्र घोषणा गरेर समुदायलाई संरक्षणमा सकृय गराउने नीति अनुसार सरकारले कार्यक्रम सन्चालन गरिरहेको छ।