पाँच पटक कलोजोको अप्रेशन भइसक्यो, रोग भने निको भएन।
अस्पतालका अनुसार अब थप अप्रेशन गर्न पनि मिल्दैन, कलोजो नै परिवर्तन गर्नुपर्छ। कलेजो परिवर्तन गर्न ४० लाख रुपैयाँ अग्रिम अस्पतालमा जम्मा गर्नुपर्नेछ। र, चिकित्सकहरुले २ महिनाभित्र कलेजो परिवर्तन नगरे ज्यान नै जोखिममा पर्ने बताएका पनि करिब एक महिना बित्न थालिसकेको छ।
तर विगत ५ वर्षदेखि भारतमा उपचार गराइरहेका दैलेख विन्ध्यावासिनि–६ का हेमराज अधिकारी यस्तो अवस्थामा अस्पतालबाट उपचार नगराइ घर फर्किएका छन्। कारण, उनीसँग कलेजो परिवर्तन गर्न आवश्यक पर्ने पैसा छैन।
बचपनमा जन्डिस रोगबाट पीडित अधिकारी ७ वर्षअघिदेखि कलेजोको समस्याबाट समेत पीडित छन्। नेपालका चर्चित सबै अस्पतालहरुमा उपचार गराउँदा पनि निको नभएपछि उनलाई भारतको लखनउमा रहेको विवेकानन्द अस्पतालमा लगिएको थियो। उक्त अस्पतालले उनलाई नयाँदिल्लिमा रहेको अपोलो अस्पतालमा रेफर गरिदियो।
सो अस्पतालमा ५ वर्षदेखि उपचार गराइरहेका अधिकारीको कलेजोको ५ पटक अप्रेशन समेत गरियो। तर अप्रेशन गरेपछि केही समयसम्म रोग निको भएजसस्तो भएपनि पुन समस्या बल्भि्कने गरेको अधिकारीकी बहिनी सरस्वती अधिकारीले जानकारी दिईन।
'५ पटक अप्रेशन गरिसकियो अब अप्रेशन गर्न मिल्दैन भनेका छन् डाक्टरहरुले' उनले भनिन्, 'अब कलेजो नै परिवर्तन गर्नुको विकल्प छैन तर परिवर्तन गर्न लाग्ने खर्च हामीसँग छैन।'
अस्पतालका चिकित्सकहरुले २ महिनाभित्रैमा कलेजो परिवर्तन गरिसक्नुपर्ने बताएको उनले जनाईन। तर एक महिना बित्न लागिसकेको छ। अस्पतालले आवश्यक रकम जम्मा नगर्दासम्म थप उपचार नगर्ने बताएपछि अधिकारीलाई अस्पतालबाट घर फिर्ता गरिएको छ। 'अब एक महिनामात्र समय बाँकी छ, ४० लाख रुपैयाँ कहाँबाट जम्मा गर्ने?' बहिनी सरस्वतीले भनिन्, '२ महिना बित्यो भने दाइलाई जे पनि हुन सक्छ।'
दाइको उपचारका लागि खर्च जुटाउन सुर्खेत आइपुगेकी सरस्वतीले सबैसँग सहयोगको अपिल समेत गरेकी छिन्। आर्थिक अभावकै कारण दाइ मृत्युको मुखमा पुगेको भन्दै उनले सबैको थोरथोरै सहयोगले पनि उनको ज्यान बच्न सक्ने बताइन। हालसम्म हेमराजको उपचारमा १२ लाख रुपैयाँ खर्च भइसकेको छ।
उनको उपचारकै लागि परिवारले भएको जग्गा बेच्नुका साथै ऋण समेत गरेको छ। 'अब बेच्नलाई पनि केही छैन, सम्पत्तिको नाममा त्यही एउटा घर मात्रै छ' सरस्वतीले भनिन्। २२ वर्षीय हेमराजका श्रीमती र एक छोरी छिन्।
अधिकारीलाई सहयोग गर्नका लागि राष्ट्रिय वाणिज्य बैंक दैलेखमा रहेको खाता नम्बर ९५/१२२४६ मा रकम जम्मा गर्न सकिनेछ।