आधुनिक मेसिनको अभावमा यहाँका बजारमा विषादी प्रयोग गरी बिक्री भइरहेका फलफूल र तरकारीको जाँच गर्न समस्या भएको छ ।
बजारमा बिक्री हुने काँचो तरकारी र फलफूलमा अत्यधिक मात्रामा विषादी प्रयोग भइरहेको भए पनि जाँच गर्ने मेसिन नहुँदा अनुगमन गर्न समस्या भएको हो ।
जिल्ला कृषि विकास कार्यालय मोरङका अनुसार तरकारीमा विषादी प्रयोग भए÷नभएको जाँच गर्ने मेसिन देशभरमा एक थान मात्र छ । हाल उक्त मेसिन काठमाडाँैको कालीमाटीस्थित तरकारी बजारमा मात्र प्रयोग भइरहेको छ ।
मेसिन नहुँदा पूर्वको विराटनगरलगायतका बजारमा बिक्री भइरहेका तरकारी र फलफूल तत्काल जाँच गर्न नसकेको कृषि विकास कार्यालयका प्रमुख राजेन्द्र उप्रेतीले बताए ।
विराटनगरमा भारतीय बजारबाट पनि प्रशस्त विषादी प्रयोग गरिएका फलफूल र तरकारी आयात भई बिक्रीवितरण हुने गरेको छ । आयात गरिएका फलफूल र विषादी यहाँबाट राजधानीलगायत देशका अन्य मुख्य सहर बजारमा पनि आपूर्ति गरिने गरिएको छ ।
किसानले तरकारीमा विषादी प्रयोग गर्ने वैज्ञानिक तरिका थाहा नपाउँदा र थाहा पाएर पनि अटेर गर्दा जथाभावी विषादी प्रयोग गरिएका फलफूल र तरकारी खान उपभोक्ता बाध्य छन् ।
किसानले धेरै र छिटो फाइदा लिन विषादी प्रयोग गरेको तरकारी तथा फलफूल तत्काल बजारमा बिक्री गर्न लाने गरेका छन् ।
हाल विषादीको प्रयोग नियन्त्रण गर्न सरकारले हरेक जिल्लामा कृषि विकास कार्यालयमा विषादी बिक्रीवितरणको अनुगमन गर्न एक विषादी निरीक्षक तोकेर अनुगमन गर्ने गरेको छ ।
यसैगरी कृषि कार्यालयले किसानलाई सुरक्षित तरिकाले विषादी प्रयोग गर्ने र विषादी न्यूनीकरणका लागि आवश्यक उपायको तालिम पनि दिँदै आएको छ । रासस
