प्रहरीमा रहेको मुद्धा मिलाउनका लागि अवैध रुपमा रकम असुल्ने खम्बुवान राष्ट्रिय मुक्ति मोर्चाका जिल्ला अध्यक्ष शिखर खम्बू धरानमा पक्राउ परेका छन्।
उनी क्षेत्र नम्बर १ का समानुपातिक उम्मेद्वारसमेत हुन्।
उनलाई इलाका प्रहरी कार्यालय धरानले बिहीबार पक्रार गरी शुक्रबार सार्वजनिक गरेको हो। उनले प्रहरीमा रहेको मुद्दा मिलाइदिन्छु भन्दै ५० हजार रकम असुलेका थिए। जसको जानकारी प्रहरीलाई पनि थिएन्। धरान १७ का किशोरकुमार राईले श्रीमती आशा सुनुवारलाई कुटपिट गरेको विषयमा मुद्दा मिलाउदिन्छु भन्दै अध्यक्ष खम्बूले रकम असुलेका थिए।
उनले प्रहरीमा मुद्धा मिलाउने भन्दै पहिले देखि नै सेटिङ गर्दै आएको प्रहरी स्रोतले बताउँछन्।
आशाले प्रहरीमा साउन ४ गते सार्वजनिक अपराध एने अन्तर्गत जाहेरी दिएका थिए। त्यही जाहेरीको आधारमा धरान प्रहरीले राईलाई पक्राउ गरेको थियो । राई पक्राउ परेपछि खम्बूले उनकी दिदीलाई प्रहरी प्रशासन, र सरकारी वकिललाई सेटिङको नाममा रकम असुलेका थिए। उनले राईको दिदीलाई पैसा नदिए जेल जान्छ? भन्दै डर देखाएपछि ६० हजारबाट सुरु भएको बार्गेनिङ ५० हजारमा कुरा मिलेको देखिएको डिएसपी संजयसिंह थापाले बताए।
डिएसपी थापाका अनुसार प्रहरीलाई मुद्धा मिलाउनका लागि पनि रकम दिँदै गरेको सूचनाको आधारमा उनलाई रकमसहित पक्राउ गरिएको हो। उनलाई धरान १९ बाट रंगेहात पक्राउ गरिएको थियो। उनलाई मूलुकी ऐन ठगीको महल अन्तर्गत कारबाही हुने छ। ऐनमा ठगी गर्नेलाई विगो कायम भएमा विगो बराबरको जरिवाना र ५ वर्षसम्म कैद हुन सक्ने कानुनी प्रावधान छ।
खम्बूले केही समय अघि आफ्नै श्रीमतीलाई पनि मरणासन्न हुने गरी कुटपिट गरेका थिए। सो कुटपिट पछि उनीविरुद्ध श्रीमतीले नै उजुरी जाहेर गरेका थिए। तर, खम्बूको दवावमा उनले जाहेरी फिर्ता लिएको थियो।