म्याग्दीको हिमाली भेगमा पाइने बहुमूल्य जडिवुटी यार्चागुम्वाको तस्करी बढ्दै गएको छ।
यार्चाको तस्करीमा लागेका म्याग्दीका चार र बागलुङका एक जना युवाहरुलाई प्रहरीले कास्कीवाट पक्राउ गरेको छ।
जिल्ला प्रहरी कार्यालय म्याग्दीका प्रहरी नायब उपरीक्षक जनार्दन जिसीले अवैध रुपमा १ किलो २ सय ८८ ग्राम यार्चा लिएर हिँडिरहेको अवस्थामा म्याग्दी मल्कावाङ गाविसका शंकर छन्त्याल,महेन्द्र छन्त्याल,जगेन्द्र छन्त्याल,रामप्रसाद छन्त्याल र बागलुङका लालवहादुर घर्तीलाई पोखराबाट प्रक्राउ गरिएको छ।
'व्यापारीले चलखेल गरिरहेको संकेत मिलेको छ, हामीले निगरानी बढाएका छौं' प्रनाउ जिसीले भने।
विगतका वर्षहरुमा म्याग्दीमा संकलित यार्चागुम्वा प्रतिकिलो १५ लाख रुपैयाँमा गाउँवाट नै बिक्रि हुने गरेकोमा यस वर्ष उचित मूल्य नपाएपछि यार्चागुम्वा गाउँमा नै थन्किएको छ। म्याग्दीमा यार्चागुम्वा रहेको जानकारी पाएपछि चिनियाँ व्यापारीहरुले हेलिकोप्टर चार्टर गरेर गाउँमै पुगेपनि यार्चा संकलनकर्ताहरुलाई नभेटी केही स्थानीय युवाहरुसँग छलफल गरी फर्किएका थिए।
यार्चा लिन आएको हेलिकोप्टर रित्तै फिर्ता भएको जानकारी गराइएपनि त्यसको खानतलासी गरिएन एक स्थानीयले भने। एयर डाइनेष्टिक ९ एन एफ क्यू नम्वरको हेलिकोप्टरमा आएका चिनियाँ व्यापारी सहितको टोली सिधा हेलिकोप्टरमा यार्चा संकलन गरिएको गाउँ मुदी मल्कावाङ गएर फर्किने क्रममा म्याग्दीको सदरमुकाम बेनी वजारको खुला मञ्चमा रोकिएपनि जिल्ला वन कार्यालय र प्रहरीले खानतलासी गर्न कुनै चासो देखाएनन्।
संकलनकर्तासँग मूल्यमा वार्गेनिङ गरेजस्तो गरी गाउँमै पुगेर हेलिकोष्टरमार्फत एक जिल्लावाट अर्कौ जिल्लामा यार्चाको ओसार पसार हुने गरेको र लाखौंको राजस्व गुम्नुका साथै स्थानीयहरु एचित मूल्य पाउनबाट वञ्चित रहेको बताइएको छ।