म्याग्दीको राम्चे गाविस २ नांगीका महाबिर पुनले २० हजार डलर नगद राशीको अन्तर्राष्ट्रिय पुरस्कार पाएका छन्।
नेपालका दुर्गम र विकट ग्रामिण बस्तीमा ताररहित ईन्टरनेट विस्तार गर्न क्रियाशिल रहेकोमा ईन्टरनेट सोसाईटीले यस वर्षको (जोनाथन बी पोष्टल अवार्ड) प्रदान गरेको हो। क्यानडाको टोरोन्टोमा सञ्चालन भएको ईन्टरनेट ईन्जिनियरीङ टाक्सफोर्सको ९० औ सम्मेलनका अवसरमा पुनलाई २० हजार अमेरिकी डलर र उक्त सम्मान उपलब्ध गराइको ईन्टरनेट सोसाईटीले आफ्नो वेभ साईट मार्फत सार्वजनीक गरेको छ।
जुलाई २० देखि सुरु भएको सम्मेलन जुलाई २५ अथवा शुक्रबार सम्पन्न हुदैछ। दुर्गम पहाडी क्षेत्रमा डिजिटल साक्षरताको विकास र सूचना प्रबिधिको विकासका लागि क्रियाशिल रहेकाले पुनलाई उक्त पुरस्कार प्रदान गरिएको सोसाईटीले जनाएको छ। पुनले नेपाल वायरलेस नेटवर्क परियोजना स्थापना गरि सन २००२ देखि म्याग्दीको नांगी गाउँबाट ताररहित ईन्टरनेट सञ्जालको बिस्तार गर्न सुरु गरेका थिए।
पुनको प्राबिधिक सहयोगमा हाल नेपालका १५ जिल्लाका करिब १७५ गाउँ ताररहित ईन्टरनेट सञ्जालसंग जोडिएका छन्। भने ताररहित ईन्टेरनेटको प्रयोगबाट म्याग्दीको हिस्तान, राम्चे, शिख, घार लगायतका गाविसमा पर्यटन प्रर्वद्धन, कृषि उपज र लद्युउद्यमीद्धारा उत्पादीत सामानको बजारीकरण, टेलीमेडिसीन सेवा सञ्चालन गरिएको छ।
सामान्य कृषक परिवारमा जन्मीएका पुनले यसअघि सन २००७ मा एशियाको नोबेल पुरस्कारका रुपमा चिनिने प्रसिद्ध रोमन म्यागासेस पुरस्कार प्राप्त गर्नुभएको थियो। अमेरीकाको नेब्रस्का विश्वविद्यालयबाट स्नाकोत्तर गर्नुभएका पुन तार रहित ईन्टरनेट सञ्जालको विस्तारसंगै पर्यटन विकास एवं वातावरण संरक्षणको क्षेत्रमा क्रियाशिल छन्।
महाबिर पुनले अन्तराष्ट्रिय पुरस्कार प्राप्त गरेको खबर पाएपछि म्याग्दीमा खुसीयाली छाएको छ। पुनले प्राप्त गरेको अवार्डले म्याग्दीको गौरबलाई थप बढाएको र यसबाट आफूहरु उत्साहीत बनेको हिमाञ्चल उच्च मावि नांगीका प्राचार्य रमन पुनले बताए।
