सवारी दुर्घटना न्यूनिकरणका लागि विभिन्न सचेतनाका कार्यक्रम संचालन गरिएता पनि पश्चिमाञ्चल क्षेत्रमा दुर्घटनाको संख्यामा भने खासै कमी आउन सकेको छैन।
पश्चिम क्षेत्रीय ट्राफिक प्रहरी कार्यालय बुटवलले आफ्नो कार्यक्षेत्र भित्र विद्यार्थी सचेतना कक्षा, सामुदायिक सेवा मार्फत कक्षा संचालन, नयाँ सुरक्षीत चालक कक्षा, व्यवसायीक चालक परिचालक कक्षा, सर्व साधारण कक्षा, अन्तरकृया, ट्राफिक सप्ताह तथा पर्चा पम्प्लेट र पोष्टर वितरण गरि विभिन्न सचेतनाका कार्यक्रम संचालन गरेको थिए।
तर जुन उद्देश्य अनुरुप सचेतनाका कार्यक्रम संचालन गरिए त्यो अनुरुप उपलब्धी भने हासिल हुन नसकेको दुर्घटनाको तथ्याङकले देखाएको छ।
गएको वर्ष पश्चिमाञ्चलका १६ वटा जिल्लामा साना ठूला गरि ६ सय ५ वटा सवारी दुर्घटना भएका छन्।
ती दुर्घटनामा परि ४ सय ६५ जनाको मृत्यु भएको छ। यो संख्या आर्थिक वर्ष ०६९/०७०/ मा भन्दा केहि कमी भने हो।
आर्थिक वर्ष ०६९/०७०/ मा यस क्षेत्रमा ६ सय ३४ वटा सवारी दुर्घटना भएका थिए। जुन दुर्घटनामा परि ४ सय ६४ जनाको ज्यान गएको थियो।
संख्याको हिसाबले आर्थिक वर्ष ०६९/७० भन्दा आर्थिक वर्ष ०७०/७१ मा सवारी दुर्घटनाको संख्या २९ र मृत्यु हुनेको संख्या मात्र एकले कमि हो।
आर्थिक वर्ष ०७०/७१ मा सबै भन्दा बढि सवारी दुर्घटना नवलपरासी जिल्लामा भएका छन्। नवलपरासीमा एक वर्षको अवधीमा १ सय ४ वटा सवारी दुर्घटना भएका छन् भने मृत्यु हुनेको संख्यामा पनि नवलपरासी अगाडी रहेको छ।
नवलपरासीमा गएको वर्ष १ सय २ जनाले सवारी दुर्घटनामा ज्यान गुमाएका छन्।
त्यस्तै रुपन्देहीमा भएका १ सय २ वटा सवारी दुर्घटनामा ७६ जनाले ज्यान गुमाएका छन्।
सबैभन्दा कम मुस्ताङमा २ वटा सवारी दुर्घटनामा १ जनाको ज्यान गएको छ।
त्यसैगरि कपिलवस्तुमा ४७ वटा सवारी दुर्घटनामा ४९ जनाले ज्यान गुमाएका छन्। पश्चिम क्षेत्रिय ट्राफिक प्रहरी कार्यालयले दिएको तथ्यांक अनुसार पाल्पामा ४२ दुर्घटनामा ४७, गुल्मीमा ४३ दुर्घटनामा १८ र अर्घाखांचीमा १४ दुर्घटनामा ३२ जनाले ज्यान गुमाएका छन्।
त्यस्तै कास्कीमा ८७ दुर्घटनामा ३६, तनहुंमा ४५ दुर्घटनामा ४१, स्याङजामा १२ दुर्घटनामा १५, गोर्खामा ८ वटा दुर्घटनामा ७, लमजुङमा २६ वटा दुर्घटनामा ८, बाग्लुङमा २४ वटा दुर्घटनामा ११, पर्वतमा ३५ वटा दुर्घटनामा १६ र म्याग्दीमा १४ वटा दुर्घटनामा ६ जनाको मृत्यु भएको छ।
गएको वर्ष सबै भन्दा धेरै बैशाख महिनामा १ सय ३१ वटा सवारी दुर्घटना भएका छन्। ती दुर्घटनामा ५९ जनाको ज्यान गएको छ।
कार्यालयका अनुसार जेठ महिनामा २८, असारमा २७, साउन महिनामा २३, भदौमा २१, असौजमा ४२, कार्तिकमा ४८, मंसिरमा ३६, पुसमा ४९, माघमा ५१, फागुनमा ३४ र चैत्र महिनामा ४७ जनाको विभिन्न सवारी दुर्घटनामा परि मृत्यु भएको छ।
संख्याको हिसाबले पहाडी जिल्लामा कम दुर्घटना भएपनि मृत्यु हुनेको संख्या भने त्यो अनुपातमा बढि हुने गरेको छ। पहाडी जिल्लामा एउटै दुर्घटनामा पनि धेरैको ज्यान जाने गरेको कारण मृतकको संख्या बढि देखिएको हो।
गत बैशाख १७ गते लु. १ ख ६२३१ नं. को यात्रु बाहक बस अर्घाखांचीको नरपानीमा दुर्घटना हुंदा १९ जनाको ज्यान गयो।
त्यस्तै गएको माघ २३ गते पाल्पाको चिदीपानी २ भालुखोलामा लु. १ ख. ४९२४ नं. को रात्री बस दुर्घटना हुंदा १४ जनाको मृत्यु भएको थियो। यी दुई दुर्घटना यस क्षेत्रका ठूला र बिर्सन नसकिने दुर्घटनामा पर्ने गरेका छन्।