काठमाडौँ महानगरपालिकाभित्र दृश्य प्रदूषण रोक्न माग गर्दै रिट आज सर्वोच्च अदालतमा रिट दायर भएको छ । महानगरपालिकाभित्र अनाधिकृतरूपमा लथालिङ्ग रहेको विज्ञापन, बोर्ड सङ्कलन गर्ने र भएका फोहरमैलालाई सफा गरी सुन्दर नगर बनाउने कानुनी दायित्वलाई काठमाडौँ,महानगरपालिकालगायत सरकारी निकायले पालना नगरेको भन्दै अधिवक्ता पदमबहादुर श्रेष्ठले सो रिट दायर गरेका हुन् ।
आधिकृतरूपमा रहेको विज्ञापन बोर्ड हटाउनुपर्ने, भित्तेलेखन मेट्नुपर्ने, भित्ता र विजुली तथा सिमेन्टका खम्बामा टाँसिएका पोष्टर, पम्पप्लेटका विज्ञापन र सडकको डिभाइडरमा राखिएको पोष्टर सङ्कलन गरी आइन्दा त्यस्ता कार्य हुन नदिन परमादेशलगायतका आदेश जारी गर्न रिटमा माग गरिएको छ ।
सो रिटमा काठमाडौँ महानगरपालिका, वातावरण तथा व्यवस्थापन विभाग, विज्ञान तथा वातावरण मन्त्रालय, सहरी विकास मन्त्रालय, गृह मन्त्रालय, सङ्घीय मामिला तथा स्थानीय विकास मन्त्रालय र काठमाडौँ जिल्ला प्रशासन कार्यालयलाई विपक्षी बनाइएको छ । रासस
