कालीमाटी तरकारी बजारमा बिषादी जाँच्न उपकरण राखेपछि एक सातायता त्यहाँ आउने तरकारी उपत्यकाका अन्य तरकारी बजारतिर जान थालेका छन्।
बाली संरक्षण निर्देशनालयले बिषादी अवशेष द्रुत विश्लेषण कार्यविधि २०७१ लागू गरेलगत्तै कालीमाटीमा त्यस्तो तरकारी नआए पनि त्यहाँ आउने तरकारी बानेश्वर, टुकुचा, लगनखेल, कोटेश्वर, बालाजु, बल्खु, नख्खुतिर जान थालेका छन्।
निर्देशनालयले गत असार २९ गते कार्यविधि लागू गरेको थियो । कार्यविधि लागू गरिएपछि कालीमाटीमा चेकजाँचका क्रममा विष हालेका तरकारी नभेटिएको निर्देशनालयका कार्यक्रम प्रमुख डिल्लीराम शर्माले सेतोपाटीलाई बताए।
व्यवसायीहरु सचेत भएका कारण पछिल्लो समयमा कालिमाटीमा विष हालेका तरकारी नआएको उनले दाबी गरे। गत साउन १ गतेदेखि अहिलेसम्म ५५ वटा तरकारीको स्याम्पलमा चेक भएकामा बिषादी भेटिएको छैन। ‘सबै परीक्षण सेभ छ, ढुक्क भएर खान मिल्ने तरकारी आएका छन्,’ उनले भने।
निर्देशनालयले गत असार ४ गतेदेखि हरेक दिन बिहान ५ बजेदेखि ११ बजेसम्म कालीमाटीमा तरकारीमा बिषादी छ कि छैन भनेर चेकजाँच गरिरहेको छ।
कालीमाटीमा तरकारीमा कडा चेकजाँच हुन थालेपछि कालीमाटी भित्रने तरकारीहरु बानेश्वर, टुकुचा, लगनखेल, कोटेश्वर, बालाजु, बल्खु, नख्खुतिर डाइर्भट भएका हुन्। ती स्थानमा तरकारीमा मापन गर्ने उपकरण राखिएका छैनन्।
पनौतीमा उत्पादन भएको आलु नारायणघाट, हेटौडा र वीरगंजसम्म पुग्ने गरेको एक व्यवसायीले बताए। अहिले हेटौडा, बारा र पर्सा लगायतका स्थानबाट पनि कम तरकारी आउन थालेको उनले बताए। कालीमाटी तरकारी बजारमा भित्रिएका तरकारीहरुमा परीक्षण गर्दा आलु, भेडेखुर्सानी, पिरो खुर्सानी, हात्तीसुढे खुर्सानी, केरा, बोडी, पालुंगोें, काउली, गाँजर र प्याजमा सबैभन्दा बढी बिषादी फेला परेको थियो। काभ्रे, भक्तपुर, धादिङ, काठमाडौं र भारतबाट कालीमाटी आएका तरकारीहरुमा बढी मात्रामा बिषादी भेटिएको थियो। बारा, चितवन, मकवानपुर, पर्साका तरकारीमा पनि केही मात्रामा विषादी भेटिएको थियो।
तस्बिर: विरेन्द्र केएमको फेसबुकबाट
