मन्त्रिपरिषद् सचिवालयले निर्देशन दिएपछि अमि रिसालको उपचारमा नर्भिक अस्पतालका डाक्टरको लापरबाहीबारे मेडिकल काउन्सिलले अनुसन्धान थालेको छ।
ब्रेन ह्यामरेजका कारण कोमामा पुगेकी रिसालको असार २७ गते मृत्यु भएको थियो।
‘यो घटनाका दोषीलाई कारबाही गर्न पत्र आएपछि छानबिन समिति बनाएका छौँ,’ काउन्सिलका अध्यक्ष दामोदर गजुरेलले भने, ‘समितिले यस विषयमा अनुसन्धान थालेको छ।’
मन्त्रिपरिषद् सचिवालयले अमि रिसालको उपचारमा लापरबाही गर्ने डाक्टरलाई कारबाही गर्न काउन्सिल र स्वास्थ्य मन्त्रालयलाई मंगलबार निर्देशन दिएको थियो।
निर्देशन अनुसार चार दिन अघि काउन्सिलको इथिकल कमिटिका संयोजक डाक्टर सतिसदेवको संयोजकत्वमा पाँच सदस्यीय छानविन समिति गठन भैसकेको थियो।
समिति संयोजक सतिश देवले मंगलबार अनुसन्धानको कार्यविधि तय भैएकोले बुधवार देखि काम सुरु हुने बताए।
‘हाम्रो समितिको पहिलो बैठक बल्ल सकिएको छ,हामीले रिसालको उपचारमा संलग्न डाक्टर, नर्स लगायत त्यहाँको म्यानेजमेन्ट संग कुरा गर्ने र रिर्पोट पनि हेरेर सत्यतथ्य पत्ता लगाउने छौँ,’ उनले भने, ‘त्यसैका आधारमा दोषीमाथि कारबाही हुने छ।’
‘नर्भिकमा डाक्टरको लापरबाहीका कारण विरामी डीप कोमामा’ भन्ने सेतोपाटीको समाचार प्रति ध्यानाकर्षण गर्दै सचिवालयले मन्त्रालय र काउन्सिललाई कारबाहिका लागि पत्र लेखेको थियो।
वाकवाकी लागेपछि नर्भिक अस्पतालमा भर्ना भएकी रिसाल तीन दिनमै डीप कोमामा पुगेकी थिइन् र डीप कोमामा पुगेको भोलिपल्टै उनको मृत्यु भएको थियो।
डाक्टरले समयमै आवश्यक जाँच नगरेका कारण उनको मृत्यु भएको आफन्तले गुनासो गरेका थिए।
