जनकपुर, चैत २८- नेपाली कांग्रेसको महासमिति बैठकमा सहभागी भएर घर फर्किने क्रममा महोत्तरीका तीनजना नेताको गएराति दुर्घटनामा परेर मृत्यु भएको छ ।
मृत्यु हुनेमा महोत्तरी सीतापुर भँगहा–८ बस्ने नेपाली कांग्रेस गाउँ इकाई कमिटीका पूर्वसभापति हिमाल अधिकारी, धर्मपुर–४ बस्ने पूर्वसभापति अणुप नारायण बछार र भँगहा–२ बस्ने पूर्वकोषाध्यक्ष बासुदेव साह कानु छन् ।
उनीहरू बीआर ०५पी– १९९२ नम्बरको बोलेरो गाडीमा महोत्तरी आइरहेका थिए । बुधबार बिहान करिब साढे ३ बजे धनुषाको लालगढस्थित बौवा होटलनजिकै सडकमा रोकेर राखिएको ना४ख १२१६ नम्बरको ट्रकसँग ठोक्किएपछि उनीहरूको घटनास्थलमै मृत्यु भएको हो ।
दुर्घटनामा अन्य ६ जना घाइते भएका छन् । घाइतेमध्ये तेजनारायण सिंहको अवस्था गम्भीर रहेको जनकपुर अञ्चल अस्पतालले जनाएको छ । समान्य घाइते हुनेमा राजकुमार साह, रामकुमार यादव, दिनेश यादव, रामछबिला यादव, रुपनारायण सिंह छन् ।
घटनालगत्तै गाडी चालक फरार रहेको घाइते राजकुमार साहले बताए । ‘चालक निदाएकाले दुर्घटना भएको हुनसक्छ,’ उनले सेतोपाटीसँग भने ।
नौजना सवार उक्त गाडीको पछाडिको सिटमा हिमाल र अणुपनारायण र बीचको सिटमा बासुदेव साह बसेका थिए । उनीहरूको सामूहिक दाहसंस्कार गर्ने तयारी भइरहेको नेपाली कांग्रेस महोत्तरीले जनाएको छ ।