विराटनगर, चैत १९- भारतीय भन्सार एजेन्टको व्यवधानका कारण भारतबाट नेपाल हुने आयात करिब दुई सातादेखि ठप्प भएको छ । भारतीय एजेन्टले जाँचपास गर्न छाडेपछि जोगबनी नाकामा हजारभन्दा बढी मालबाहक सवारीसाधन थन्किएका छन् ।
नेपालस्थित भन्सार अधिकारीका अनुसार भारतबाट आउने मालबाहक सवारी बाह्र दिनदेखि जोगबनी नाकामै रोकिएका छन्, नेपालपट्टि भित्रिन दिइएको छैन । जसका कारण दैनिक दुई करोडको हाराहारीमा राजस्व असुली प्रभावित भइरहेको विराटनर भन्सार कार्यालयका प्रमुख राजेन्द्रप्रसाद दाहालले बताए । उनका अनुसार तेस्रो देशबाट आएका मालबाहक सवारी पनि भित्रिने क्रम न्यून छ ।
नेपाली तथा भारतीय व्यापारीबाट घुस लिई भन्सार छल्ने गरेको उजुरी आधारमा निगरानी गर्दा त्यहाँको सेन्टर ब्यूरो अफ इन्भेष्टिगेशन (सिआईबि)ले भारतीय भन्सारमा कार्यरत चार जना कर्मचारीलाई गत चैत ८ गते रंगेहात पक्राउ गरेको थियो । ती कर्मचारी पक्राउ भएपछि भन्सार एजेन्टले जाँचपास बन्द गरेका छन् ।
‘भारतबाट आउने मालबाहक सवारी रोकिएका कारण यहाँ भन्सारको राजस्व असुली ठप्पप्रायः छ, तेस्रो देशबाट आउने क्रम पनि अत्यन्तै कम छ,’ दाहालले सेतोपाटीसँग भने, ‘भन्सार एजेन्टले जाँचपास छोडेपछि जोगबनी नाकामा ढुवानीका साधन थन्किएको अवस्था छ ।’
जोगबनी कस्टममा भन्सार एजेन्ट र कर्मचारीको मिलेमतोमा भन्सार छलि हुनेगरेको सूचना पाएपछि सिआईबीले छापा मार्ने क्रममा भन्सारका असिस्टेन्ट कमिशनर शिवशंकर यादव, सुप्रिन्टेन्डेन आदेशकुमार, निरीक्षक राजेश कुमार र भुलेश्वर पासवानलाई पक्राउ गरेको थियो । ब्यूरोले जोगबनी कस्टममा कार्यरत एजेन्ट प्रतिनिधि लक्ष्मण यादवको घरमा पनि छापा मारेको थियो । ती कर्मचारीलाई अझै छाडिएको छैन । ‘यो भारतीय भन्सारको मामला भएकाले हामीलाई जानकारी भएन,’ भन्सार प्रमुख दाहालले भने ।
भन्सार कार्यालयका अनुसार तेस्रो मुलुकबाट आएका दुरूस्त कागजात भएका सिलबन्दी कन्टेनरहरू मात्र छोडिने गरेका छन् । भारततिरको समस्या भएकाले प्रतिक्षा गर्नुको विकल्प नभएको भन्सार प्रमुख दाहालले बताए । विराटनगर भन्सारले चालू वर्षमा दैनिक करिब ४ करोड बराबर राजस्व संकलन गर्ने लक्ष्य राखेको छ ।
भन्सार एजेन्ट संघ केन्द्रीय सदस्य किशोर शाहीका अनुसार भन्सार अधिकृत पक्राउ र एजेन्ट प्रतिनिधिको घरमा छापा मारेपछि भातीय भन्सारमा कार्यरत एजेन्टहरू भागाभाग छन् । ब्यूरोले अझै पनि त्यहाँ कडा निगरानी गरिरहेको छ ।
जोगवनी कस्टममा दुई जना मात्र आधिकारीक एजेन्ट प्रतिनिधि छन् । एक जनाले कलकत्ता र अर्काले बम्वई बन्दरगाहाबाट एजेन्ट प्रतिनिधिको इजाजत लिएका छन् । अन्य पचास भन्दा बढी एजेन्ट तिनीहरूले प्रतिनिधिका रूपमा खटाएका छन् ।
उद्योग संगठन मोरङका अनुसार भारतीय भन्सारमा सामान रोकिँदा औद्योगिक क्षेत्रमा कच्चापदार्थको अभाव हुन थालेको छ । त्यसैगरी, औद्योगिक क्षेत्रबाट भारत निर्यात पनि ठप्प भएको छ । ‘दैनिक तीस वटा जति ट्रक भारत जान्थे, भारतीय भन्सारको किचलोले रोकिएका छन्,’ संगठनका कार्यालय सचिव सोमनाथ अधिकारीले भने ।
भारतीय भन्सारको घुसकाण्डले गर्दा नेपालको उद्योग व्यापारमा समस्या आएको भएको नेपाली उद्योगी व्यापारीले तत्काल समस्या समाधान गर्न दुबै देशका सरकारसँग आग्रह गरेका छन् ।
प्रकाशित मिति: 2013-04-01 12:33:25