प्रेमको परिभाषा?
प्रेम के, माया के?
भिन्नता थाहा छैन मलाई र तिमीलाई पनि
किनकि प्रेम एक परिभाषा अनेक
तपाईंसँग म जिकिर गर्न चाहन्न
उनीसँग तर्क गर्ने इच्छा छैन
तिमीसँग म टाढै रहन्छु; बुझ्छौ जस्तो लाग्दैन
उसलाईचाहिँ भन्दै आएको हो
'प्रेम कहिल्यै स्थायी हुँदैन'
हो प्रेम कहिल्यै स्थायी हुन्न
उदाहरण उनीहरू, तपाई, तिमी र उ हुन्
क्रमैसंख्यामा लहरै उभ्याइदिएकी छु
प्रेमनं१
स्कूले जीवनको
मेरी राम्री साथीलाई फकाउँदैछ लागेथ्यो
थाहा पाउँदा की म रहेछु, उसको जाने बेला भइसकेथ्यो
वर्षौंपछिको हाम्रो कुराकानी
'मलाई सम्झिन्छौ तिमी' बाट भयो
प्रेम नं २
मभन्दा धेरै फरक
हाँसी मृदुल मुस्कान रेट्ने कोमल घाँटीहरू
बगलीमा छुरा बोक्ने उसलाई हुत्याइदिए मैले भोटेकोशीको जम्पमा
प्रेमनं३
मेरो स्कुले रोमान्स भन्छु
यस अर्थमा कि त्यहाँ छल थिएन
एक मिठो आकर्षण - हो कि होइन जस्ता पलहरू
नारायणहिटीका रूखमा साँझ बस्ने इग्रेटहरू साक्षी छन्
कि कसरी छुट दै गर्दा त्यो सडकमा सुष्क स्वरमा उसले भन्यो
'तिमीले मलाई यस्तै सोच्छौ - मौसमी माया!'
अँगालोमा कसी बिदा सदाको लागि गर्दा भित्रभित्रै म बगिरहें
किनकि उ 'मौसमी' थिएन तर मसँग साहस थिएन
प्रेमनं४
अलि अनौठो छ यो कथा
म सम्झिरहन चाहन्न
अत्याएर आफ्नालाई तापमा त्यसको म पागल सरी नाचिरहें
प्रेमनं५
खिच्यो केले त्यसतिर अन्देशा मात्र छ
एकोहोरो वा दोहोरो - रेखा साह्रै मिहीन छ
पुराना घाउहरूको छाँयामा एउटा वर्जित कथन छ
यिनै हुन् मेरा प्रेमहरू लहरै उभिएका
र नउभ्ने त्यो केटो क्रमसंख्या बाहिरको - उ पनि हो मेरो प्रेम!
उ भन्छ 'तिमी जंगली घोडा हौ, तिमी दौड
जहाँ-जसरी-जुन वेगमा चाहन्छौ - म रोक्दिन'
उसको एउटै आश छ - म फर्कनेछु कुनैदिन थाकेर
बिर्सिन्छ सायद कि म फर्केर कहिल्यै हेर्दिनँ
रहर छ उसलाई सुन्ने 'तिमीनै हौ मेरो साँचो प्रेम'
थाहा छैन उसलाई सायद कि पटकपटक देखेकी छु उसको आँखामा
एक बलियो मायाको पेटी - कोर्रा हान्न तयार कुनै दिन
यदि बनिहालें म उसकी समयको अन्तरालमा
नकार्न सक्दिनँ म कि उ हुनसक्छ मान्छेले गरेको 'साँचो र सुन्दर' प्रेम
र टुक्रिन सक्ने सुन्दर र झिनो प्रेम
आखिर भाव बदलिन्छ समयसँगै पत्तै नदिई
सुन आज ए मेरा प्रेमहरू
मेरो मनका गाडधनहरू
म प्रेमलाई प्रेम गर्छु व्यक्तिलाई हैन
मनको हुटहुटीलाई प्रेम गर्छु
जो चालै नपाई गुड्छ आफ्नै गतिमा
कहिले यसमा त कहिले उसमा।।
