के म कहिले बुझ्न सक्छु
गोरुगाडा र बजारको
धुलोले भरिएका सम्बन्धको अर्थ
यो संसार
मलाई यति राम्रो किन लाग्दछ
के यो कुरा जान्ने
कुनै उपाय छ मसँग!
मलाई कति कम कुराहरु थाहा छ
धोबीहरुका साबुन
र आफ्ना छिमेकीहरुका निधारका बारेमा
के म हावाको वर्णविन्यास
ठीक–ठीक जान्दछु
के म राख्न सक्दछु
एउटा चुँडिएको केशलाई
कार्य र कारणको ठ्याक्कै बीचमा
मलाई कसरी थाहा हुन सक्दछ
मेरो भोकमा
मेरो ढाड दुख्नु
संलग्न छ या छैन
म किन
र कुन चाहि तर्कले हिन्दु हुँ
के म कहिले जान्न सक्दछु?
कवि परिचयः
इ. सं. १९३४ को जुलाई महिनाको ७ तारिखको दिन भारतको चकिया (उत्तर प्रदेश, बलिया जिल्ला) भन्ने गाउँमा जन्मेका केदारनाथ सिंह हिन्दी भाषाको राम्रा कवि मात्रै होइनन्, राम्रा निबन्धकार र समालोचक पनि मानिन्छन्। प्रारम्भिक शिक्षा चकियामै गरेका उनले बनारसको उदय प्रताप कलेजबाट आफ्नो स्नातक तहको अध्ययन सकेका थिए भने एम. ए. र पि. एच. डी. भने काशी हिन्दु विश्वविद्यालयबाट गरेका हुन्। गोरखपुरमा केही समय हिन्दीको शिक्षक भएर काम गरेपछि उनले जहावरलाल नेहरु विश्वविद्यालय, नयाँ दिल्लीमा प्राध्यापकका रुपमा काम गरे। पछि उनी त्यही हिन्दी विभागको प्रमुख पनि भएका थिए।
पचासको दशकको प्रारम्भिक वर्षहरुबाटै विधिवत रुपमा काव्य–लेखन सुरु गरेका उनका ‘अभी बिल्कुल अभी,’ ‘जमीन पक रही हैँ,’ ‘अकाल मे सारस,’ ‘यहाँ से देखो,’ ‘बाघ,’ ‘तोल्सतोय और साइकल’ जस्ता उत्कृष्ट कविताका संग्रहहरु प्रकाशित छन्।
उनले साधारण, दैनिक बोलीचालीका भाषाहरु र विम्बहरुको प्रयोग गरेर एक प्रकारको जटिल विषयबस्तुको प्रस्तुति गरेका छन्, आफ्ना कविताहरुमा। उनी आफ्नो कविता–संग्रह ‘अकाल मे सारस’ को लागि सन् १९८९ मा उनी साहित्य एकेडेमी पुरस्कारबाट सम्मानित भएका थिए।