शनिबार गएको विनाशकारी महाभुकम्पमा परि पुरिएर घाइते भएका गाउँलेहरुको उद्दार तथा राहतका लागि सरकारी टोली अहिलेसम्म पुग्न नसकेको भन्दै विदेशमा रहेका नेपालीहरुले चिन्ता व्यक्त गर्न थालेका छन्।
हाल रोजगारीका लागि मलेसियामा रहेका काभ्रे जिल्ला टिकुचा गाउँ विकास समिति वडा नं ७ बस्ने सुशील घिमिरेले सेतोपाटीमा फोन गर्दै गुनासो गरे, काभ्रेको पनौति भूमिडाँडा, देउपुर, टिकुचा, घिमिरे गाउँ लगायतका क्षेत्रमा अहिलेसम्म पनि सरकारी उद्दार तथा राहत टोली पुग्न सकेको छैन। जसका कारण अहिले पनि कतिपय मानिसहरु घरले पुरिएर मरेका, कतिपय सख्त घाइते अवस्थामा उपचारको पर्खाइमा बसेका सयौं महिला, बालबालिका र बृद्ध तथा अशक्तहरु उद्धार र राहतको पर्खाइमा बसीरहेका छन्।
अहिले आफूहरुको मोबाइलमा व्याट्री पनि सकिएको र उद्दार र राहतका लागि कहाँ सम्पर्क गर्ने भन्ने सामान्य जानकारी समेत नपाउदा पीडितहरुले आफूलाई फोन गरी सम्भब भएसम्म संबन्धित निकायमा खबर गरिदिन आफूलाई मलेसियामा फोन गरी आग्रह गरेको घिमिरेले बताए।
