सार्क शिखर सम्मेलन सकिएलगत्तै राष्ट्रपति रामवरण यादवले सार्कका पाहुनाको सम्मानमा रात्रिभोज दिँदैछन्। शीतल निवासमा भोजपछि विदेशी सरकार प्रमुखहरू स्वदेश फर्किन थाल्नेछन्।
शीतल निवासाट बाहिरिने पहिलो पाहुना भारतीय प्रधानमन्त्री नरेन्द्र मोदी हुनेछन् । उनी सवा ८ बजे त्रिभुवन विमानस्थलबाट भारतीय वायू सेनाको बोइङ बिजनेस जेट ७३७ बाट नयाँ दिल्ली उड्ने छन् । भारतीय वायू सेनाका २ जहाज र ४ हेलिकोप्टर मंगलबारदेखि काठमाडौंमा छन्।
शीतल निवासबाट निस्कने दोस्रो पाहुना पाकिस्तानी प्रधानमन्त्री नवाज सरिफ हुनेछन् । साढे आठ बजे पाकिस्तानी वायू सेनाका दुई जहाज सरिफलाई लिएर इस्लामावाद उड्ने छ।
राति सवा ९ बजे श्रीलंकाली राष्ट्रपति महेन्दा राजापाक्ष आफ्नो विशेष विमानबाट फर्किँदा माल्दिभ्सका समकक्षी अव्दुल्ला यमीन अव्दुल गयुमलाई लिफ्ट दिँदै छन् । श्रीलंकन एयरको विशेष विमानले राष्ट्रपति गयुमलाई माल्दिभ्स राजधानी मालेसम्म लगिदिने भएको छ।
त्यस्तै राति साढे ९ बजे अफगान राष्ट्रपति असरफ घानी पनि आफ्नो विशेष विमानबाट फर्किँदैछन्।
बंगलादेशी प्रधानमन्त्री शैख हसिना भने शुक्रबार बिहान साढे १० बजे बंगलादेश विमानको नियमित उडानबाट फर्किनेछन्।
दुई दिनदेखि राजधानीबासीलाई भैरहेको सडक सास्ती शुक्रबार दिउँसो १ बजेसम्म रहनेछ । काठमाडौं छाड्ने अन्तिम पाहुना भुटानी प्रधानमन्त्री ल्योन्छेन छिरिङ तोव्गाय ड्रुक एयरको नियमित उडानबाट पारो उड्नेछन्।
