सार्कको १८ औं शिखर सम्मेलन समापन हुनै लाग्दा कुनै पनि मुख्य सझौता नहुने देखिएको छ।
यो सम्मेलनमा सहमतिका लागि तय गरिएका महत्वाकांक्षी सडक, रेल र उर्जा सम्झौताहरु लगभग नहुने भएको छ।
पकिस्तानको असहमतिपछि रेल र सडकमार्गबाट सार्क मुलुकहरुलाई जोड्ने सम्झौता नहुने निश्चित भइसकेको छ। 'उर्जा सम्झौतामा अझै छलफल हुँदैछ, तर यसमा पनि पाकिस्तानको असहमति कायम रहेको छ,' परराष्ट्रका एक अधिकारीले सेतोपाटीसँग भने।
कर्यक्रम समितिबाट पारित भएर आएको प्रतिवेदनमा छलफल गर्ने क्रममा सचिवस्तरीय बैठकले रेल र सडक सम्झौता हुने टुंगो लागेपनि उर्जा सझौतामा पाकिस्तानको आन्तरिक गृहकार्य बाँकी रहेकोले अहिले हतारमा गर्न नहुने अडान लिएको छ। त्यसका बाबजूद तीनवटै प्रस्ताव विदेशमन्त्रीस्तरिय बैठकमा निर्णयका लागि पठाइएको थियो।
तर विदेशमन्त्रीस्तरीय बैठकले स्थायी समिति बैठकबाट आएको सहमतिमा समेत असहमति भएको थियो। जसले गर्दा यसपटकको सार्क सम्मेलनबाट उल्लेख्य सहमति कुनै विषयमा नहुने भएको हो।
यसैबीच सार्कको काठमाडौं घोषणा पत्र तयारी गर्ने क्रम अहिले पनि चलिरहेको स्रोतले बतायो। घोषणापत्रमा पहिले ३१ बुँदा रहेपनि त्यो बढेर ३७ बुँदा पुगेपछि अहिले पनि सदस्य राष्ट्रका प्रतिनिधिहरुले त्यसलाई अन्तिम रुप दिन छलफलमा जुटिरहेका छन्।
सार्कको १९ औं सम्मेलन पाकिस्तानको इस्लामावादमा हुने कुरामा भने यसअघि नै सहमति भइसकेको छ।