सार्कको अठारौं शिखर सम्मेलनमा सहभागी हुन काठमाडौं आएका राष्ट्र प्रमुख तथा सरकार प्रमुखहरु मध्ये ५ देशका विशिष्ट पाहुनाहरु आजै राति स्वेदश फर्कने भएका छन्।
ती मध्ये आ–आफनै देशको विमान हुने भारतीय प्रधानमन्त्री नरेन्द्र मोदी, पाकिस्तानका प्रधानमन्त्री मुहम्मद नवाज सरिफ, अफगानिस्तानका राष्ट्रपति मोहम्मद असरफ घानी र श्रीलंकाका राष्ट्रपति महेन्दा राजापाक्ष विहीबार राति नै स्वदेश फर्कने भएका छन्। उनीहरु बिहीबार साँझ राष्ट्रपति डा. रामवरण यादवले आयोजना गर्ने रात्री भोजमा सरिक भइसकेपछि लगत्तै स्वदेश फर्कने भएका हुन्।
त्यसमध्ये प्रधानमन्त्री नरेन्द्र मोदीको भारतीय वायु सेनाका २ वटा वोइङ विजनेश जेट ७३७ र ४ वटा हेलिकोप्टर काठमाडौंस्थित अन्तराष्ट्रिय विमानस्थलको पार्किङमा छन्। प्रधानमन्त्री मोदी वायू सेनाका विशेष विमानबाट बिहीबार राति नै नयाँदिल्ली फर्कने भएका हुन्।
त्यस्तै पाकिस्तानका प्रधानमन्त्री नवाज सरिफलाई लिन आजै साँझ पाकिस्तानी वायु सेनाका दुई जहाज काठमाडौं आउँदैछन्। सरिफ वायू सेनाको विशेष विमानबाट आजै राति स्वेदश फर्कने छन्।
त्यसरी नै अफगानिस्तानका राष्ट्रपति असरफ घानी पनि विशेष विमानबाट आजै स्वदेश फर्कन लागेका छन्। राष्ट्रपति घानीलाई लिएर मंगलबार काठमाडौं आएको अफगानिस्तानको विशेष विमान प्रधानमन्त्री मोदीको जहाजसँगै पार्किङमा राखिएको छ।
श्रीलकन राष्ट्रपति महेन्दा राजापाक्ष पनि बिहीबार राति नै आफनै देशको निजी विमानबाट स्वदेश फर्कन लागेका छन्। उनलाई लिन श्रीलकंन विशेष विमान विहीबार साँझ काठमाडौं आइपुग्ने विमानस्थल स्रोतले जानकारी दिएको छ।
आफ्नै देशको विशेष विमान नभएका कारण माल्दिभ्सका राष्ट्रपति अव्दुल्ला यमीन अव्दुल गयुम कतार एयरवेजको नियमित उडानबाटै बिहीबार राती नै दोहा हुँदै स्वदेश फर्कन लागेका छन्। समाचार स्रोतका अनुसार उनी जतिसक्दो चाडो स्वदेश फर्कन हतार गरिरहेका छन्।
उता स्वास्थ्यस्थिति प्रतिकुल भएका कारण समेत प्रधानमन्त्री शैख हसिना काठमाडौं–ढाकाको शुक्रबारको नियमित उडान विमान बंगलादेशबाट स्वदेश फर्कन लागेकी छन्। उनी अस्वस्थताका कारण बिहीबार काभ्रेको धुलीखेलस्थित द्वारिकाज रिसोर्ट आयोजना गरिएको रिट्रिटमा समेत गइनन्।
भुटानका प्रधानमन्त्री ल्योन्छेन छिरिङ तोव्गाय पनि शुक्रबार काठमाडौं–थिम्पुको नियमित उडान ड्रुक एयरबाट स्वदेश फर्कने भएका छन्।
जानकारी अनुसार काठमाडौंमा आएदेखि विभिन्न स्थानको अनौपचारिक भ्रमण गर्ने प्रधानमन्त्री तोव्गाय एक मात्र सार्कका विशिष्ट पाहुना हुन। उनले काठमाडौंका पशुपतिनाथ मन्दिर, स्वयम्भुनाथ र बौद्ध स्तुपा पुगेर विशेष पूजा अर्चना गर्नुका साथै अवलोकन भ्रमण समेत गरेका थिए।