सार्क शिखर सम्मेलनका लागि भनेर सरकारले रिहर्सलका नाममा आज बिहानैदेखि यात्रुले हैरानी भोग्नु परिरहेको छ। आजै देखि लागू भएको जोर विजोर प्रणालीमाथि कमै मात्रामा सवारी चलेको अवस्थामा गरेको रिहर्सलले थप सास्ती भोग्नु परेको छ।
आफ्नो नियमित काम काजका लागि बिहान हिँडेका यात्रुहरु 'पिक आवर'मै सहरका मुख्य चोकमै लामो जाममा परेका छन्।
कारकेड सहितको अभ्यास टोली एयरपोर्टबाट, कालीमाटीको सोल्टी होटलका लागि प्रस्थान भईरहेको छ । एरपोर्ट देखि कालीमाटी सम्म चल्ने चल्ने सवारी साधनहरु अहिले पुर्ण रुपले प्रभावित भएका छन्। सिनामंगल, तिनकुने, बानेश्वर, माईतिघर, थापथली, त्रिपुरेश्वर चोक हुदै चल्ने सवारी साधन रोकीए। अबको केही समय पछि अन्य रुटहरुमा पनि सवारी अभ्यासहरु हुने ट्राफिक कन्ट्रोल रुमले जनाएको छ ।
त्यसअगावै विमानस्थलदेखि कालीमाटीसम्मको सडक पूरै खाली गराइएको थियो। जसका कारण सिनामंगल, भक्तपुरबाट आएका गाडी तिनकुनेमा, बानेश्वर, माइतिघर, थापाथली, पाटनबाट आएका गाडी त्रिपुरेश्वरमा, कलंकीबाट हिँडेका गाडी सोल्टीमोडमा, कीर्तिपुर, बल्खुबाट हिँडेका गाडी कालिमाटी चोकमा रोकिएका थिए।
साथै यतिवेला उपत्यकामा पिक आवर सुरु भएको छ । पिक आवरको सुरुवातसँगै मुख्य मुख्य चोकहरुमा चल्ने सवारी साधनहरुले पालो पर्खनु पर्ने अवस्था रहेको छ। जसको कारण उपत्यकाबासीले थप सास्ती भोग्नु परेको छ।