एकीकृत माओवादीका उपाध्यक्ष तथा पूर्व प्रधानमन्त्री डा.बाबुराम भट्टराईले राष्ट्रिय एकताका लागि आफ्नो पार्टीले अधिकांश शीर्ष नेतालाई मधेशबाट उमेद्वार बनाउने बताए ।
चुनावी प्रचारका लागि बुटवल पुगेका भट्टराईले राष्ट्रिय एकतालाई बलियो बनाउन मधेशी समुदायका नेतालाई पहाडबाट र पहाडी समुदायका नेतालाई मधेशबाट उम्मेदवार उठाउने तयारी भइरहको समेत खुलाए ।
जनसंख्याको चाप बढेसँगै मधेशको भूमिका राष्ट्रिय एकताको लागि बढिरहेको बताउदै उनले मधेशमा पार्टीले ध्यान केन्द्रित गरेको बताए ।
आगामी कार्तिकको अन्तिम साता वा मंसिरको पहिलो सातामै चुनावको मिति घोषणा हुने बताउदै भट्टराईले छिटो चुनाव गरी देशलाई अन्धकारबाट बचाउन सबै लाग्नुपर्ने बताए ।
पहिलो संविधानसभाबाट जनआन्दोलनका उपलब्धी संस्थागत नभएको भन्दै उनले आगामी चुनावबाट जनआन्दोलनका उपलब्धी संस्थागत गराउन पार्टी दृढ रहेको बताए ।
चुनावमा नेकपा–माओवादी लगायत अन्य आन्दोलनरत दलहरू पनि सहभागि हुने भट्टराईले दाबी गरे ।
