मैनतडा–३ जहरेमा नेकपा–माओवादीका कार्यकर्ता र प्रहरीबीच बुधबार झडप भएको छ। स्थानीय प्रशासनले सञ्चालन गरेको एकीकृत घुम्ति शिविरमा माओवादी कार्यकर्ताले अवरोध पुर्याउन खोजेपछि झडप भएको हो। माओवादी कार्यकर्ताले शिविरमा ढुंगा प्रहार गरेपछि प्रहरीले ४ राउण्ड हवाइ फायर गर्नुका साथै ६ राउण्ड अश्रु ग्यास प्रहार गरेको थियो। झडपका कारण करिब एक घण्टा शिविर अवरुद्ध भएको थियो।
प्रहरीले माओवादीका केन्द्रीय सदस्य भरत बमसहित ८ जनालाई नियन्त्रणमा लिएपछि झडप रोकिएको हो। कार्यकर्ता पक्राउको विरोधमा माओवादीले आज दिनभर स्थानीय मैनतडाको जहरे बजार बन्द गराएका छन्। झडप रोकिएपछि पुनः शिविर सञ्चालनमा आएको छ।
सदरमुकामबाट प्रदान गरिदै आएको सेवा गाउँमै पुगेर प्रदान गर्ने लक्ष्यसहित आयोजना गरिएको शिविरमा माओवादी कार्यकर्ताले हुलहुज्जत गरेको स्थानीय प्रशासनले जनाएको छ। प्रमुख जिल्ला अधिकारी पुरुषोत्तम कुँवरले माओवादी कार्यकर्ताले एक्कासी ढुंगा प्रहार गरेपछि स्थिति नियन्त्रणमा लिन हवाई फायर र अश्रु ग्यास प्रहार गर्नु परेको बताए।
यता नेकपा–माओवादीले भने शान्तिपूर्ण विरोधमा प्रहरीले दमन गरेको आरोप लगाएको छ। बुधबार वीरेन्द्रनगरमा पत्रकार सम्मेलन गरेर प्रहरी प्रशासनले शान्तिपूर्ण रुपमा गरिएको विरोधको कार्यक्रममा पञ्चायती शैलीमा धरपकड गरेको जनाएको छ। नेकपा–माओवादीका केन्द्रीय सदस्य कृष्ण धमलाले प्रहरीले मैनतडामा प्रदर्शन गरेको रवैयाले पञ्चायत र शाहीशासनको झल्को दिएको बताए। उनले शान्तिपूर्ण विरोध गर्न पाउनु सबैको अधिकार भएको भन्दै प्रशासनले आफूहरुको अधिकार हनन् गरेको आरोप लगाए। धमलाले विभिन्न ३३ दलले विदेशीलाई नागरिकता दिने अध्यादेशको तत्काल खारेजी र नागरिकता वितरणको कार्य रोक्न संघर्षका कार्यक्रम सञ्चालन गरेको भन्दै सोही कार्यक्रम अन्तर्गत मैनतडाको घुम्ति शिविरमा अवरोध गरिएको बताए।
माओवादीले प्रहरीले दमन गरेको भन्दै भोली (विहीबार) सुर्खेत जिल्ला बन्दको आह्वान गरेको छ। बुधबार प्रेस विज्ञप्ति प्रकाशित गरी माओवादी सुर्खेतले विहीबार यातायात, शैक्षिक संस्था तथा व्यापार सबै बन्द गराईने माओवादीले जनाएको छ। जिल्ला सेक्रेटरी प्रशान्त आर.सीले विज्ञप्ति प्रकाशित गरी शान्तिपूर्ण विरोधमा व्यापक प्रहरी परिचालन गरी आफ्ना नेता तथा कार्यकर्तामाथि दमन, धरपकड, गिरफ्तारी र यातना दिएको विरोधमा जिल्ला बन्द गरिएको जनाएका छन्।
