उपप्रधान तथा गृहमन्त्री वामदेव गौतमले अघिल्लो दुई पटक गृहमन्त्री सम्हाल्दा लागेको 'अनुचित आरोप'बाट मुक्ति पाउने गरि काम गर्ने बताएका छन्।
हिजो (मंगलवार) राती ९ बजे गृह मन्त्रालयमा पद बहाली भएपछि गृह मन्त्रालय, जनपद, सशस्त्र प्रहरीका आइजीपी र अरु अधिकारीहलाई सम्वोधन गर्दै उनले भने, 'मैले यसपाला इमेज बनाउनेगरि काम गर्नुपर्ने छ।'
यसअघिका दुई पटक सात/सात महिना मात्र गृह मन्त्री हुन पाएकाले काम गर्न नसकेको बताउँदै यसपाला 'गरेर देखाउने' प्रतिवद्वता व्यक्त गरे।
'म तेस्रो पटक गृह मन्त्रालयको नेतृत्व गर्दैछु। पहिलो र दोस्रो सात महिनाको मात्र रह्यो,' उनले भने, 'यस पटक मैले काम गरेर देखाउनुछ। मलाई यसअघि अनुचित किसिमले लगाएका आरोपबाट मुक्ति पाउनु छ।'
२०५३ सालमा राप्रपाका लोकेन्द्रबहादुर चन्द र २०६५ सालमा माओवादी अध्यक्ष प्रचण्ड नेतृत्वको सरकारमा गौतम उपप्रधान एवं गृह मन्त्री थिए।
स्थानीय निकायमा धाँधली, एयरपोर्टबाट सुन तस्करी, प्रहरी संगठनमा हस्तक्षेप लगायत आरोप गौतममाथि छ।
२०५४ सालमा पार्टी फुटाएपछि एमाले नै उनलाई खुला मञ्चबाट भ्रष्टाचारी घोषणा गरेको थियो।
अघिल्ला पटकहरुमा आफूलाई जवरजस्ती विवादमा तान्ने कोशिस गरेको दाबी गर्दै यो कार्यकाल सबै किसिमका आरोप मित्थ्या सावित गराउने घोषणा उनले गरेका छन्।
'मेरो यो कार्यकाल भ्रष्टाचार विरुद्ध शून्य सहनशीलता हुनेछ,' गौतमले भने, 'कोही कसैले अपराधलाई उन्मुक्ति दिएर घुस खाएमा या सिपाहीको मुखको माँड खोसेर भ्रष्टचार गरेमा ती सबै कारबाहीमा पर्नेछन्।'
गौतमले अपराध नियन्त्रणका लागि काठमाडौं उपत्यकाबाट विशेष अभियान थालनी गर्न खुला निर्देशन दिए।
'अपराध नियन्त्रण थालनी काठमाडौंबाट सुरु गर्नुहोस्,' उनले भने, 'गुण्डागर्दी मात्र नियन्त्रण गर्न सकियो भने पनि धेरै अपराध कम हुन्छ।'
गृह सचिव, जनपद, सशस्त्र आइजिपी, राष्ट्रिय अनुसन्धान प्रमुख सहित अधिकारीहरुलाई लामो सम्वोधन गरेका गौतमले 'तुरुन्त अपराध नियन्त्रण' थाल्न भने।
'अपराध नियन्त्रणको थालनी आजै रातीदेखि गर्नुस,' गौतमले कडा शव्दामा भने, 'मलाई कुरा हैन २४ घन्टामा रिजल्ट चाहिन्छ।'
काठमाडौंमा गुन्डागर्दी रोक्न सकेमात्र शान्ति, सुरक्षामा उल्लेख्य सुधार देखिने गौतमको ठहर छ।
'वामदैव गौतम गृहमन्त्री भएको सुन्ने वित्तिकैदेखि गुण्डा, लफङ्गा, चोर र लुटेराहरुको सातो जानु पर्छ,' उनले भने, 'मेरै पार्टीका कोही परे भने पनि कत्ति नहिच्काई पक्राउ गर्नुस् र कानुनी कारबाही थाल्नुस्।'
एमालेकै गुन्डालाई कारबाही गर्दा कतैबाट दबाब आए आफूले नै त्यसको सामना गर्ने आश्वासन प्रहरी/प्रशासनलाई दिए।
'मेरै पार्टीका गुण्डा भएपनि म आफै डटेर तपाईहरुको पक्षमा लाग्छु। कागज बनाएर ल्याउनुस। मै साइन गरेर बक्तव्य जारी गरिदिन्छु,' उनले भने।
क्यासीनोसँग प्रहरीका केहि अधिकारीको मिलिभगत रहेको आरोप गौतमले लगाए। क्यासिनोमा कुनै हालतमा नेपालीलाई प्रवेश दिन नहुने निर्देशन उनले दिए।
'अघिल्लो चोटी म गृहमन्त्री हुँदा प्रहरी क्यासिनोमा छापा मार्न पुग्नु अघि नै प्रहरी आउँदै छ भन्ने सूचना लिक गरिएछ,' गौतमले सजग गराए, 'अबका दिनमा त्यस्तो भए सैह्य हुँदैन।'
नेताहरुकाहाँ धाउने र आफ्नो चाकरीमा नआउन गौतमले निर्देशन दिएका छन्। 'काम गर्नुस्, त्यसकै अधारमा मूल्याङ्कन हुन्छ,' उनले भने।
'चेन अफ कमाण्ड' कार्यान्वयन गर्ने नाममा जनपद र सशस्त्र प्रहरीभित्र सिपाही-हवल्दारहरुलाई अब आइन्दा 'तँ' नभन्न गौतमले आदेश दिएका छन्। 'अब आइन्दा तँ नभन्नुस्,' उनले तत्काल गर्नु भनेर निर्देशन दिए, 'कम्तिमा तिमी त भन्नुस्।,'
गौतमले आफ्नो ध्यान नेपालको अध्यागमन नीति सशक्त रुपमा कार्यन्वयन गराउनेमा पनि भएको बताए।
कयौं विदेशी नेपालमा अवैधानिक रुपमा बसोबास गरिरहेका छन्? ती किन बसिरहेका छन्?
आफैले प्रश्न गरेर गौतमले उत्तर दिए, 'प्रष्ट छ, हाम्रा छिमेकी मुलुकविरुद्व जासूसी गर्न र नक्कली नोटको कारोबार गर्छन्।'
भारतको नाम नलिई सिमानामा बसेर छिमेकीविरुद्व गतिबिधि संचालन गर्न आफूले छुट नदिने धारणा गौतमले व्यक्त गरे।
'सीमानामा बसेर विदेशीले हाम्रा छिमेकीविरुद्ध गतिविधि गर्न छुट पाउनु हुन्न,' 'शरणार्थीकै रुपमा नेपाल छिरेका भएपनि तिनीहरुलाई पक्राउ गर्नुपर्छ।'
