इँटा बेचेको करिब १२ लाख रुपैयाँ संकलन गरेकै रात पूर्वसभासद सदरुल मियाँको हत्या भएको उनका निकटहरुले दाबी गरेका छन्। उनीहरुका अनुसार मियाँ इँटाको पैसा लिएर हिँडेका थिए। पैसा बैंकमा जम्मा गरे–नगरेको वा अरु कसैलाई दिए–नदिएको यकिन नभएको निकटस्थहरु बताउँछन्।
सप्तरीको कल्याणपुर-२ विसनपुरस्थित उनको आफ्नै हुमा आयल ट्रेडर्स पेट्रोल पम्पमा गएराति उनको हत्या भएको हो।
'हिजो बेलुका विसनपुर चोक छेवैको एउटा बिहेमा गएका बेला उहाँलाई तारान्तार फोन आएको रहेछ,' हत्यापछि घटनास्थलमा पुगेका सप्तरी क्षेत्र नम्बर ५ का पूर्वसभासद मृगेन्द्रसिंह यादवले सेतोपाटीसँग भने, 'त्यसपछि म एकछिनमा आँउछु भन्दै उहाँ निस्कनुभएको थियो रे। फर्किनुभएन।'
उनका अनुसार मियाँको हत्या भएको कोठाको झ्याल-ढोका सबै खुल्लै थियो। चिनजानको मानिसले सँगै गएर कोठैमा हत्या गरेको हुनसक्ने उनले बताए।
पेट्रोल पम्पको पहिलो तलामा सुतिरहेका मियाँलाई लछारपछार गरी घाँटी रेटेर हत्या गरिएको पाइएको छ। उनी करिब १ सातादेखि पेट्रोल पम्प काउन्टरमाथिको कोठामा सुत्दै आएको निकटहरुले बताएका छन्। घर नजिकै भए पनि उनी साता दिनदेखि किन पेट्रोल पम्पमै सुतेका थिए भन्ने प्रश्न अनुत्तरित छ। यादवले भने मियाँ घरमै सुत्ने गरेको दाबी गरेका छन्।
पाँच दाजुभाइमध्ये मियाँ जेठा हुन्। उनकी एक श्रीमती, दुई छोरा र तीन छोरी छन्। मियाँका एक भाइ विदेशमा छन भने अरु तीनैजना सप्तरीमै व्यवसाय गर्छन्।
मध्यमवर्गीय परिवारका मियाँले भारतमा केही वर्ष काम गरेका थिए। देश फर्केपछि आफ्नै व्यावसाय सुरु गरेका मियाँ सप्तरीका सफल व्यवसायी मानिन्छन्। उनको सप्तरी र सुनसरीमा गरी तीनवटा इँटाभट्टा र सप्तरीमा एउटा पेट्रोल पम्प र एउटा सःमिल छन्।
राजनीतिक यात्रा
मियाँको पारिवारिक पृष्ठभूमि राजनीतिक होइन। पूर्वसभासद मृगेन्द्रसिंह यादवसँग निकट सम्बन्ध रहेका मियाँले उनैलाई राजनीतिमा लामो समयसम्म सघाए।
यादव सप्तरीको निर्वाचन क्षेत्र नम्बर ५ बाट उठ्ने गर्थे। गत संविधानसभाको निर्वाचनमा सप्तरीमा छैठौं क्षेत्र थपिएपछि यादव ६ नम्बर निर्वाचन क्षेत्रमा सरे र मियाँले ५ नम्बर क्षेत्रमा स्वतन्त्रका रूपमा उम्मेदवारी दिए।
मुसलमान, यादव र चौधरी समुदायको बाहुल्य रहेका ५ र ६ नम्बर निर्वाचन क्षेत्रमा यादव र मियाँले सहकार्य गरे। क्षेत्र नं ६ बाट मुस्लिम भोट मृगेन्द्रसिंह यादवलाई दिलाउन मियाँले सहयोग गरेका थिए भने क्षेत्र नं ५ बाट यादव भोट मियाँलाई दिलाउन मृगेन्द्रले सहयोग गरेका थिए ।
क्षेत्र नम्बर ५ मा मधेसी जनअधिकार फोरमका छेदेलाल चौधरी र कांग्रेसका मुक्तिनाथ चौधरीबीच चौधरी समुदायको मत बाडिँदा मियाँलाई जित्न सजिलो भएको थियो।
चुनावमा एकअर्कालाई सहयोग गरेको यादवले पुष्टि गरे। 'मेरो उहाँसँग उहाँको बुबाकै पालादेखिको चिनजान हो,' उनले भने, 'उहाँहरु पहिले हाम्रै गाँउमा बस्नुहुन्थ्यो। हामीबीच एक आपसको सहयोग रहिरह्यो।'