मधेसमा चुनावी अभियानलाई प्रभाकारी ढंगमा अघि बढाउने प्रतिवद्धाताका साथ महोत्तरीको बर्दिवासमा आयोजित एमालेको २ नं प्रदेश स्तरीय २ दिने बृहत कार्यकर्ता भेला बिहिबार सम्पन्न भएको छ।
भेलामा प्रदेश नं २ स्थित ८ जिल्लाका अध्यक्षसहित १ हजार ३ सय बढी कार्यकर्ताको सहभागिता थियो।
एमालेका महोत्तरी जिल्ला कमिटी सचिव भानुभक्त पोखरेलका अनुसार भेला निर्वाचन केन्द्रित थियो । भेलामा आसन्न चुनावमा कार्यकर्तालाई योजनावद्ध ढंगमा परिचालन गरी एमालेलाई अग्रस्थान दिलाउन सहभागीबीच प्रतिवद्धता गरिएको थियो ।
भेलाले दुई नम्बर प्रदेशमा तोकिएका १ सय २८ वटा स्थानीय तहमध्ये प्रमुख प्रतिपक्षी दल नेकपा एमालेले कम्तिमा सय वटामा चुनाव जिताउने निष्कर्ष निकालेको छ।
जिल्ला–जिल्लामा एमाले पार्टीप्रतिको दृष्टिकोण र जिल्लाका स्थानीय निकायमा एमालेलाई जिताउन रणनीति बनाउँदै एमालेको अगुवा भेला सकिएको एमाले पार्टी सचिव योगेश भट्टराईले बताए ।
वैशाख ३१ हुने स्थानीय तहको निर्वाचनलाई लक्षित गरेर बर्दिबासमा फागुन २५ गते हुने भनिएको एमालेको सभा सप्तरी गोलीकाण्डपछि २ नम्बर प्रदेशमा मेची महाकाली अभियान स्थगित गरिँदा दुई नम्बर प्रदेशको एमालेको चुनावी अभियान अन्यौलमा परेको थियो।
सप्तरीको हिंसात्मम घटनापछि केही समयपछि एमाले फेरि मधेस केन्द्रित चुनावी माहौल बनाउन जुटेको छ।
जिल्ला कमिटी सचिव भानुभक्त पोखरेलकाअनुसार पूर्व प्रधानमन्त्रीहरु माधव नेपाल, झलनाथ खनाल, महासचिव ईश्वर पोखरेल, प्रचार विभाग प्रमुख योगेश भट्टराईलगायत केन्द्रीय स्तरका नेताको उपस्थिति रहेको भेलामा मधेसवादी दलका भूमिका र गतिविधिबारे बृहत छलफल भएको थियो ।
‘मोर्चाका नाममा तराईमा जवासिंह, गोइत समूह अपराधिक गतिविधि गर्न सक्रिय रहको हाम्रो जिल्लागत रिपोटिङ्गले देखाएको छ। मोर्चाले यसलाई नियन्त्रण गर्न सकेको छैन,’ एमालेका सचिव योगेश भट्टराईले भेलापछि भने, ‘यसले समाजमा असहिष्णुता ज्यादा बढाइको छ। मधेशी पहाडीबीचको समाजिक सद्भाव भडकायो।’
मधेशमा ठूला पार्टीहरुलाई ती समूहहरुले कमजोर बनाएको बताउँदै उनले भने, ‘राज्यका निकायहरु पनि मधेसमा कमजोर पार्ने काम भइरहेको हामीले पाएका छौं।’
मधेसी मोर्चाले एमालेप्रति फैलाएको भ्रम चिर्न दुई नम्बर प्रदेश अन्तर्गतका जिल्लाका मुख्य स्थानहरुमा आम सभा, कोण सभाको आयोजना गरिने उनले बताए।
सबै अपराधिक गतिविधि र भ्रमको एउटै औषधी हो स्थानीय निकायको चुनाव। चुनावले सबै पार्टीहरुलाई ठीक ठाउँमा ल्याउँछ । चुनाव मोर्चाको विरुद्धमा भने होइन उनले बताए ।
भेलामा सीमांकन हेरफेर, भाषा र नागरिकताको सवालमा पार्टीले लिएको नीति सही भए पनि राष्ट्रियसभाको प्रतिनिधित्व भने जनसंख्याकै आधारमा हुनुपर्ने एमालेका मधेसी नेता कार्यकर्ताहरुले सुझाव दिएको सहभागी नेताले बताए ।
एमालेले राष्ट्रिय सभामा प्रदेशहरुबाट समान संख्यामा प्रतिनिधित्व हुनुपर्ने अडान लिइरहेका बेला सोही पार्टीका मधेसी कार्यकर्ताले जनसंख्या र भूगोलका आधारमा समानुपातिक र समावेशी प्रतिनिधित्व हुनुपर्ने बताएका हुन्।
भेलामा पोलिटब्यूरो सदस्य तथा धनुषाका सांसद सत्रुघन महतोले संविधान संशोधन र स्थानीय चुनावको सम्बन्ध नभएकाले पहिले चुनाव त्यसपछि संशोधनमा जान सकिने बताएका थिए।
कांग्रेसका मधेसी नेताहरुले संविधान संशोधन नगरी २ नम्बर प्रदेशमा चुनाव हुन नसक्ने भनिरहेका बेला एमालेका मधेसी नेता कार्यकर्ताले भने चुनावमा जानैपर्ने अडानमा कायम रहन नेतृत्वलाई सुझाव दिएका हुन्।
सिराहाका नेता रामअवतार यादवले मधेसी जनता चुनावको पक्षमा रहेकाले मोर्चाकै कारण चुनाव रोक्नुपर्ने अवस्था नरहेको बताए।
एमालेको प्रदेश भेलाले सप्तरी बाहेकका मधेसका अन्य जिल्लाहरुमा निर्वाचन जित्न सकिने निश्कर्षसमेत निकालेको छ । भेलामा सप्तरीबाहेक अन्य जिल्लाका अध्यक्षहरुले चुनाव जित्ने रिपोर्ट पेश गरेको हो ।
सप्तरी जिल्लामा भने मोर्चा, कांग्रेस र माओवादीले एमाले कार्यकर्तालाई गाउँमा जान समेत अवरोध गरेकाले प्रतिकुल अवस्था रहेको एमाले सप्तरीका अध्यक्ष गोविन्द न्यौपानेले बैठकमा रिपोर्ट पेश गरेका थिए ।
बुधवारदेखि बर्दिबासमा शुरु भएको २ नम्बर प्रदेशस्तरीय कार्यकर्ता भेलामा सो प्रदेश अन्तर्गतका ८ जिल्ला अध्यक्षले आ आफ्नो जिल्लाका स्थानीय तहको सम्भावित चुनावी आँकलन सहितको रिपोर्ट पेश गरेका थिए। सप्तरीबाहेक अन्य जिल्लाबाट पहिलो पार्टी बन्ने आँकलन पेश भएको धनुषा क्षेत्र नम्बर ५ का अध्यक्ष शीतल साहले बताए ।
नेताहरुले २ नं प्रदेशका ८ वटै जिल्लामा कार्यकर्ता प्रशिक्षणका साथै योजनावद्धढंगमा निर्वाचनमुखि कार्यक्रम बनाएर प्रचारप्रसारमा जुटन निर्देशन दिएका थिए । उनीहरुले चुनावी वातावरण निर्माणका लागि जनताको घरदैलोसम्म पुगेर निर्वाचन अभियानलाई गति दिन आग्रह गरेका थिए ।
कार्यकर्ताको सकृय र उर्जावान भूमिकाले नै स्थानीय तहमा एमालेलाई अग्रस्थान दिलाउन सक्ने केन्द्रीय नेताहरुको धारणा थियो । यसका लागि जनताको विश्वास जित्ने गरी चुनावी अभियानलाई अघि बढाउनुपर्ने आवश्यकता उनीहरुले औंल्याएका थिए ।
पूर्व प्रधानमन्त्री एवं एमाले वरिष्ठ नेता नेपालले संविधान घोषणासंगै राजनीतिक अधिकार प्राप्तिको एउटा अध्याय सकिएकोले अधिकार प्राप्तीको नाममा अब टायर बाल्नुु र बन्द हडताल गर्नु सन्दर्भहीन भएको धारणा राख्दै मुलुकको समृद्धिका लागि स्थानीय निर्वाचनको अवसरलाई उपयोग गरी अघि बढन आवश्यक रहेको बताए ।
यो निर्वाचन दलहरुलाई राजनीतिकरुपबाट अघि बढ्न र जनताबाट अनुमोदित हुने अवसर हो नेपालले मधेसवादी दललाई लक्षित गर्दै थपे संविधान संशोधनका लागिसमेत निर्वाचनकै माध्यमले जनताबाट अनुमोदन हुन आवश्यक छ ।
प्रदेश संयोजक सत्यनारायण मण्डलको अध्यक्षतामा सम्पन्न भेलामा राजविराज घटनाको चीरफार गर्दै चुनावी रणनीति तय गरिएको जनाइएको छ ।
