आसन्न स्थानीय तहको निर्वाचन र निर्वाचन आचारसंहितालाई ध्यानमा राख्दै नेपाल प्रेस युनियनले पूर्व निर्धारित केन्द्रीय समितिको बैठक र राष्ट्रिय भेला स्थगन गरेको छ।
देश नै स्थानीय तहको चुनावमा केन्द्रित हुन लागेका अवस्थामा युनियनमा आबद्ध पत्रकार पनि स्थानीय तहको चुनावमा होमिनुपर्ने अवस्था र निर्वाचन आयोगले जारी गरेको निर्वाचन आचारसंहितासमेत लागू भएको सन्दर्भमा युनियनको केन्द्रीय सचिवालय बैठकले तत्कालका लागि बैठक र भेला स्थगन गरेको महासचिव अजयबाबु शिवाकोटीले बताए।
युनियनले केन्द्रीय समिति बैठक यही चैत २५ गते र राष्ट्रिय भेला चैत २६ गतेका लागि कास्कीको पोखरामा गर्ने तय गरेको थियो । बैठकले नेपाल प्रेस युनियनका पश्चिमाञ्चल संयोजक प्रदीप काफ्लेका पिता पुरुषोत्तम काफ्लेको असामयिक निधनप्रति श्रद्धाञ्जलि व्यक्त गर्दै शोकसन्तप्त परिवारजनमा समवेदना व्यक्त गरेको छ ।
साथै सिकिस्त बिरामी भई अस्पताल भर्ना भएका नेपाल प्रेस युनियन पर्साका पूर्वअध्यक्ष काशीनाथ यादवको शीघ्र स्वास्थ्य लाभको कामना पनि गरेको छ ।
बैठकले स्थानीय तहको निर्वाचन हुन गइरहेको परिवेशमा मातृपार्टी नेपाली काँग्रेसका पक्षमा निर्वाचन माहोल बनाउन युनियन आबद्ध सबै सदस्यलाई कलम चलाउन पनि आग्रह गरेको छ । रासस
