सूचना तथा सञ्चारमन्त्री सुरेन्द्रकुमार कार्कीले मन्त्रालय मातहतका निकायलाई जनकल्याणकारी कार्यक्रम ल्याउन निर्देशन दिएका छन्।
मन्त्रालयमा आज आयोजित आर्थिक वर्ष २०७४/७५ को प्रस्तावित कार्यक्रम तथा बजेट छलफल कार्यक्रममा उनले मातहतका निकायलाई जनताको प्रत्यक्ष सरोकार राख्ने विषयलाई प्राथमिकताका साथ अघि बढाउन जोड दिए।
सरकारी सञ्चारमाध्यमले समाजमा विद्यमान विकृति र विसङ्गति हटाउन जनचेतनामूलक कार्यक्रम अघि बढाउनुपर्ने उल्लेख गर्दै मन्त्री कार्कीले भने, “मुलुकका दूरदराजमा खाद्य सामग्रीको उपयोग तथा सुरक्षासम्बन्धी ज्ञानको चेतना फैलाउने कार्यक्रम ल्याउनुस् ।”
समाजका हरेक क्षेत्र समावेशी नभएसम्म मुलुक समृद्धितर्फ अघि बढ्न नसक्ने भन्दै उनले मन्त्रालयबाट प्रवाह हुने सेवा दुर्गममा सहज रुपमा पु¥याउने व्यवस्था गर्न निर्देशन दिए ।
कार्यक्रममा मन्त्रालयका सचिव महेन्द्रमान गुरुङले सबै निकायलाई सङ्घीय संरचनाअनुसारको प्रस्ताव ल्याउन निर्देशन दिँदै उल्लिखित सबै कार्यक्रमको औचित्य पुष्टि हुनुपर्ने बताए। उनले संविधान, चौधौं योजना, मन्त्रालयसँग सम्बन्धित ऐन नियम र सरकारका निर्णयका आधारमा बजेट प्रस्ताव गरेको जानकारी गराए।
कार्यक्रममा मन्त्रालयको नीति, योजना, अनुगमन तथा मूल्याङ्कन शाखा प्रमुख रुद्रादेवी शर्माले मातहतका निकायको आगामी आवको कार्यक्रम र बजेट प्रस्तुत गरेका थिए। उनले मन्त्रालयलाई राष्ट्रिय योजना आयोगबाट आगामी आवका लागि चार अर्ब ९९ करोड ३० लाखको बजेट सिलिङ्ग प्राप्त भएको जानकारी दिए।
कार्यक्रममा राष्ट्रिय समाचार समिति (रासस)का कार्यकारी अध्यक्ष कुलचन्द्र वाग्ले, गोरखापत्रका संस्थानका महाप्रबन्धक सुशील कोइराला, नेपाल टेलिभिजनका महाप्रबन्धक गोविन्द रोका, रेडियो नेपालका कार्यकारी निर्देशक सुरेशकुमार कार्की, नेपाल दूरसञ्चार प्राधिकरणका अध्यक्ष दीगम्बर झा, प्रेस काउन्सिल नेपालका प्रमुख प्रशासकीय अधिकृत झविन्द्र भुसाल, मुद्रण विभागका लेखा अधिकृत रेना ढुङ्गानालगायतले आ–आफ्ना निकायका प्रस्तावका बारेमा थप स्पष्ट पारेका थिए। रासस