नेपाल कम्युनिष्ट पार्टी संयुक्तले स्थानीय तह निर्वाचनलाई व्यवस्थित गर्नका लागि पार्टी अध्यक्ष गणेश साहको संयोजकत्वमा नौ सदस्यीय ‘केन्द्रीय निर्वाचन परिचालन समिति’ गठन गरेको छ।
नवगठित समितिमा कल्पना राणा, लक्ष्मी साह, जयदेव जोशी, सुनील मानन्धर, केदारचन्द्र शर्मा, कल्याणी साह, श्रीलाल महासेठ र पद्मराज जोशी सदस्य छन्।
यही चैत १२ र १३ गते काठमाडौँमा बसेको नवौँ केन्द्रीय कार्यसमितिको तेस्रो विस्तारित बैठकले स्थानीय तहको निर्वाचनलाई श्रमजीवी, किसान, महिला, दलित एवम् सिमान्तकृतहरुको हक अधिकार सुनिश्चित गर्ने अवसरका रुपमा सहभागिता जनाउने निधो गरेको छ ।
बैठकले एनसेल मोबाइल कम्पनीवाट असुल हुनुपर्ने ३३ अर्बको लाभकर असुली गर्न सरकारको ध्यानाकर्षण गराउँदै स्थानीयस्तरमा राजनीतिक द्वन्द्व कम गर्न राजनीतिक दल तथा जनतालाई संयम हुन आग्रह गरेको छ ।
बैठकले विभिन्न जिल्लामा दल दर्ता गराउन छुटेका दलहरुलाई निश्चित समय तोकेर सूचना आह्वान गर्नुपर्नेमा जोड दिँदै दललाई थ्रेसहोल्ड सीमाको खारेजी गर्न माग पनि गरेको प्रवक्ता केदारचन्द्र शर्माले मंगलबार जानकारी दिए।
गत फागुन २६ गते कञ्चनपुरको पुनर्वास नगरपालिका र आनन्द बजारमा भारतीय सुरक्षा बल (एसएसबी) को गोली प्रहारबाट सहादत प्राप्त गर्ने स्थानीय एवम् सहिद गोविन्द गौतमप्रति श्रद्धाञ्जली तथा घटनाका दोषी भारतीय सुरक्षाकर्मीलाई कानुनको दायरामा ल्याउन, तिनबाट क्षतिपूर्ति भराउन बैठकले माग गरेको छ ।
त्यस्तै, गत फागुन २३ गतेको सप्तरी घटनामा मृत्युवरण गरेकालाई पनि सहिद घोषणाको माग गरिएको छ । रासस
