प्रमुख प्रतिपक्ष नेकपा एमालेका अध्यक्ष केपी शर्मा ओलीले ‘वान बेल्ट वान रोड’को चिनियाँ प्रस्ताव नेपालका लागि अत्यावश्यक रहेको बताएका छन्।
अध्यक्ष ओलीले नेपाललाई बाहिरी दुनियाँसँग जोड्न पनि चीनको ‘वान बेल्ट वान रोड’को अवधारणा फलदायी हुने स्पष्ट पारे। निर्वाचनको घोषणा पत्र तयारीको कामलाई समेत सघाउ पुर्याउने उद्देश्यका साथ ललितपुरमा आयोजित विद्धत सभालाई सम्बोधन गर्दै उनले नेपालले अब बाहिरी र भित्री दुवै दुनियाँसँगको सम्बन्ध विकासका लागि सार्कको मात्रै भर पर्न नहुने पनि स्मरण गराए।
अध्यक्ष ओलीले राष्ट्रिय पुनर्निर्माण प्राधिकरण आफैं राज्य पीडित भएको टिप्पणी पनि गरे। सरकारले काम गर्ने वातावरण बनाउन नसकेकै कारण पुनर्निर्माण प्राधिकरणले काम गर्ने अवस्था नरहेको उल्लेख गर्दै सरकारले राज्यका सबै क्षेत्रलाई पीडा दिँदै गएको आरोप पनि लगाए। अध्यक्ष ओलीले सुशासन, पुनर्निर्माण, स्वास्थ्य, शिक्षा सबै क्षेत्र राज्य पीडित भएको उल्लेख गर्दै त्यसबाट उन्मुक्ति दिने काममा आफनो पार्टी प्रतिवद्ध रहेको बए। उनले पुनर्निर्माण प्राधिकरणको सिईयो परिवर्तन गर्दा झनै अनुभवको कमी देखिएको भन्दै भूकम्प पीडितलाई सरकार आफैंले पीडा थपिदिएको पनि स्पष्ट पारे।
अध्यक्ष ओलीले मुलुकको हितलाई सर्वोपरी ठानेर आफनो पार्टी अघि बढेको दाबीसमेत गरे। उनले दलीय घेराबाट माथि नउठी मुलुकलाई समृद्ध बनाउन नसकिने पनि बताए। कार्यक्रममा विज्ञहरुले संविधान भित्रैबाट मुलुकको समस्या समाधान गर्न दलहरुलाई मिलेर अघि बढ्न सुझाव दिएका थिए।
संविधानविद् काशीराज दाहालले दलहरु मिलेर मुलुकलाई निकास दिनुको विकल्प नरहेको बताए उनले मुलुकलाई संविधान निर्माणको प्रयोगशाला बनाउने खेल भइरहेको भन्दै त्यसबाट जोगिन पनि दलहरु सचेत हुनुपर्नेमा जोड दिए। संविधानविद् दाहालले मुलुकमा अझै संवैधानिक संस्कृतिको समेत विकास हुन नसकेको भन्दै चिन्ता पनि व्यक्त गरे।
विज्ञहरुले दलहरुको संकीर्ण सोचाईकै कारण मुलुक शक्तिशाली राष्ट्रहरुको प्रयोगशाला बन्ने अवस्था आएको भन्दै अध्यक्ष ओलीको ध्यानाकर्षण पनि गराएका थिए ।
