नेपाली कांग्रेसका अधिकांश केन्द्रीय सदस्यले संविधान संशोधनको प्रस्ताव सदनबाट टुंगो लगाएरमात्रै स्थानीय तहको निर्वाचनमा जानुपर्ने धारणा राखेका छन्। आइतबार बसेको कांग्रेस केन्द्रीय समिति बैठकमा बोल्दै कांग्रेसका सदस्यहरुले संविधानको सफल कार्यन्वयनका लागि प्रमुख विपक्षी दल एमाले र असन्तुष्ट मधेसी मोर्चालाई सहमतिमा ल्याएर संशोधनको प्रक्रिया टुंगो लगाउन सुझाव दिएका थिए।
बैठकमा बोल्दै पार्टी नेता रामशरण महत, फरमुल्लाह मन्सुर, रमेश रिजाल, अजय चौरसिया, उमाकान्त चौधरी, रामकृष्ण यादव लगायतले सकेसम्म संशोधन प्रस्तावलाई संसदबाट पारित गरेर नभए प्रक्रियाबाट टुंगो लगाएर निर्वाचनमा जानु नै पार्टी र देशका लागि उपयुक्त हुने बताएको बैठकपछि रमेश रिजालले सेतोपाटीलाई बताए।
बैठकको शुरुमा सभापति शेरबहादुर देउवाले खुमबहादुर खड्कालाई समय दिएका थिए। उनले हिन्दुराष्ट्रको विषयलाई जनमत संग्रहबाट टुंगो लगाउन माग गरे।
शेखर कोइरालाले सबैभन्दा व्यवस्थित रूपमा आफ्नो लिखित प्रस्ताव पेश गर्दै पार्टीले संविधान संशोधन प्रस्तावमा मधेसी मोर्चा र एमालेलाई सहमतिमा ल्याएर अघि बढ्न पार्टी नेतृत्वले क्रियाशिल भूमिका खेल्न माग गरेका थिए।
रामशरण महतले मधेसी मोर्चाले पटक पटक माग फेरिरहँदा उनीहरुको अडान र चाहना स्पष्ट हुन नसकेको भन्दै यसबारे पार्टीको तर्फबाट वार्तामा सहभागी सदस्यहरुले स्पष्ट पार्न माग गरेका थिए।
यसरी बोल्ने सदस्यहरुले संविधान संशोधन प्रक्रियामा मधेसी मोर्चा सहमति हुन्छ कि हुँदैन, यसबारे एमालेको सहमति रहन्छ रहँदैन भन्ने विषयमा प्रश्न राखेपछि सभापति देउवाले वार्ता प्रक्रियामा संलग्न नेताहरु विमलेन्द्र निधि र रमेश लेखकमध्येबाटै स्पष्ट पार्न समय दिएका थिए।
मधेसी मोर्चा र एमाले नेतृत्वसँग भएको वार्ताको विषयमा जानकारी गराउदै निधिले मोर्चा र एमालेबीच सहमतिको विन्दु पहिल्याउने विषयमा सकारात्मक वार्ता भएको बताए।
त्यसैगरी सरकारी कार्यदलमा सहभागी सदस्य कृष्णप्रसाद सिटौलाले पछिल्लो समय सीमांकनको विषयलाई थाती राखेरै भए पनि बाँकि विषयमा सहमति गरी अघि बढ्ने विषयमा एमाले र मोर्चाले सकारात्मक धारणा दिएको बताए। उनले संविधान निर्माण प्रक्रियामा महत्वपूर्ण भूमिका खेलेको विपक्षी दल एमालेलाई पनि संविधान कार्यान्वयनमासँगै लिएर अघि बढ्नु आजको आवश्यकता रहेको बताए।
उनले मोर्चा र एमालेसँग भएको वार्तामा धेरै कुरा बाहिर ल्याउँदा बन्न लागेको सहमति भत्किन सक्ने खतरा रहेको भन्दै आफू सहमति गरेर निर्वाचनमा जाने विषयमा विश्वस्त भएको जानकारी बैठकमा गराएका थिए।
सिटौलाले स्थानीय तहको संरचनामा भएको व्यापक परिवर्तनलाई ख्याल गर्दै गाउँपालिकाको निर्वाचनमा टिकट वितरणमा क्षेत्रीय समितिको सिफारिसमा जिल्लाले र नगरपालिकादेखि महानगरसम्मको टिकट पूर्व सांसद, जिल्लाका पूर्व सभापति लगायतको सिफारिसमा केन्द्रले तय गर्न सुझाव दिएका थिए।
गत कात्तिकदेखि केन्द्रीय समिति बैठक नबोलाएको भन्दै पार्टी नेता रामचन्द्र पौडेल पक्षले सभापति देउवाको आलोचना गर्दै आए पनि आजको बैठकमा गुरूराज घिमिरे र रामकृष्ण यादवबाहेक कुनै सदस्यले पनि प्रश्न उठाएनन्।
राजदूत नियुक्ति, प्रहरी प्रमुखको नियुक्तिको विषयमा सभापतिको भूमिकालाई लिएर पत्रपत्रिकामा चर्को आलोचना भइरहेको भन्दै घिमिरेले यसबारे नेतृत्व सजग हुन नसकेको बताए। घिमिरेले बोल्दै गरेको समयमा बीचमा रोक्दै देउवाले पत्रपत्रिकामा जे जसरी आएको कुरा छ त्यसले आफूलाई बल पुगेको धारणा भन्दै बाँकी कुरा राख्न भनेका थिए।
खड्काले राखेको हिन्दुराष्ट्रको विषयमा मीन विश्वकर्माले खण्डन गर्दै पहिलो संविधानसभामा पार्टीले लोकतन्त्रलाई मात्रै मुद्दा बनाएर चुनावमा जादा पार्टी पराजित भएको दावी गरे। तर पछि ७० सालको निर्वाचनमा संघीयता, समावेशी लोकतन्त्र, गणतन्त्र र धर्मनिरपेक्षता आफैंले स्थापित गरेको मुद्दा हो भनि जनतामा जाँदा परिणाम सकारात्मक भएको भन्दै अब पनि निर्वाचनको मुखमा यस्ता विवादित धारणा नगर्न आग्रह गरेका थिए।
आजको बैठकले २९ सदस्यीय कार्यसम्पादन समिति गठन गरेको छ।
पार्टी विधान अनुसार, केन्द्रीय समिति बैठक बस्न नसकेको अवस्थामा पार्टीले लिनुपर्ने निर्णय गरी पछि बस्ने केन्द्रीय समिति बैठकबाट अनुमोदन गराउनुपर्छ। केन्द्रीय तहमा रहेका सबै विभागसँग समन्वय गर्ने, संसदीय समिति र संसदका विषयगत समिति संयोजकहरुसँग पनि उक्त समितिले छलफल र राय सुझाव दिन सक्छ।
उक्त समितिमा पार्टी नेता शेखर कोइराला नपरेपछि केही सदस्यले आश्चर्य प्रकट गरेका थिए।
पार्टी नेता पौडेल पक्षसँग वरिष्ठता क्रमका आधारमा राख्ने सहमति अनुसार सभापतिले उक्त प्रस्ताव राखेको एक नेताले बताए। वरिष्ठताको विषयमा यसअघि नै विवाद देखिएपछि कात्तिकमा बसेको केन्द्रीय कार्यसमिति बैठकले ज्ञानेन्द्रबहादुर कार्कीको संयोजकत्वमा आनन्द ढुंगाना र फरमुल्लाह मन्सुरसहितको सिफारिस समिति गठन गरेको थियो।
उक्त समितिले दुई पटक बैठक बसे पनि कुनै कुरा टुंगो लगाउन नसक्दा सभापतिले हाल विद्यमान वरियताका आधारमा निर्णय लिएको समितिका एक सदस्यले बताएा
पार्टीको अर्को बैठक सोमबार बिहान ८:३० बजे पुन केन्द्रीय कार्यालयमा बस्ने छ।
