नयाँ संविधानको व्यवस्था अनुसार निर्धारित स्थानीय तहको संरचना र संविधान संसोधनअघि स्थानीय निकायको निर्वाचनको विरोधमा रहेको मधेशी मोर्चाले जिल्ला समन्वय समिति महोत्तरी र जलेश्वर नगरपालिकाको कार्यालयको बोर्डमा कालो पोतेको छ। उनीहरुले दुवै कार्यालयमा तलाबन्दी समेत गरेका छन्।
साविक जिल्ला विकास समितिको कार्यालय जिल्ला समन्वय समितिमा रुपान्तरित भएपछि बनाइएको साइनबोर्ड मोर्चाका कार्यकर्ताले मेटाउनका लागि शुक्रवार १० बजे कालो पोतेका हुन्। ‘मधेशमा बलजफ्ती चुनाव गराउन चाहे हामी कडा प्रतिवाद गर्नेछौ,’ सद्भावना पार्टीका महोत्तरी जिल्ला अध्यक्ष सुदिप कुमार झाले भने। साइनबोर्ड मेटदै स्थानीय तह संचालन र निर्वाचन हुन नदिने मोर्चाका स्थानीय नेताहरूले घोषणा गरे।
सरकारले स्थानीय तह कार्यान्वयनमा आएको घोषणा गरे सँगै केही दिन अघि मात्रै सदरमुकाम जलेश्वरमा रहेको जिल्ला विकास समितिलाई रुपान्तरण गरि जिल्ला समन्वय समिति नामाकरण गरिएको थियो।
मोर्चाका नेताहरूले जिल्ला समन्व्य समितिका स्थानीय विकास अधिकारी बस्ने कोठा, लेखा र प्रशासनिक कामकाज सञ्चालन गर्ने कोठाहरूमा तालाबन्दी गरेका छन ।
यसैगरी मोर्चाका नेताहरूले जलेश्वर नगरपालिकामा समेत पुगेर त्यहाँको साइनबोर्ड कालो पोतेर मेटाएका छन् भने कार्यालय प्रमुख बस्ने कोठा लगायत लेखा र प्रसानिक काम हुने कोठाहरूमा तालाबन्दी गरिएको मोर्चाका घटकदल तराई मधेश लोकतान्त्रिक पार्टी महोत्तरी अध्यक्ष अभिराम शर्माले बताए।
मोर्चा नेता कार्यकर्ताहरूको तालाबन्दी पश्चात दुवै कार्यालयको कामकाज ठप्प हुन पुगेको छ ।
मोर्चाको आन्दोलनको त्रासले कर्मचारीले कार्यालयमा बसेर काम गर्न सकेका छैनन्। मोर्चाको अवरोधका कारण महोतरीमा स्थानीय तह कार्यान्वयनमा समस्या देखिएको छ । जिल्ला समन्वय समिति महोत्तरीको बोर्डमा मधेसी मोर्चाले प्रदेश मधेस सरकारको बोर्ड टाँसेका छन । जिल्ला विकास समिति महोतरीको बोर्ड हटाएर राखिएको समन्वय समितिको बोर्डमा मोर्चाका कार्यकर्ताले प्रदेश मधेस सरकार, संघीय मामिला तथा स्थानीय विकास मन्त्रालय जिल्ला विकास समितिको कार्यालय महोत्तरी लेखिएको बोर्ड टाँसेका छन्।
तमसपाका केन्द्रीय सदस्य सुरेश पाण्डे, संघीय समाजवादी फोरम नेपालका महोत्तरी अध्यक्ष रामनरेश राय, सदभावनाका उपाध्यक्ष सुदिप कुमार झा तमलोपा जिल्ला अध्यक्ष अभिराम शर्मा लगायतको नेतृत्वमा पुगेका कर्मचारीहरूले मूल गेट र समितिको कार्यालय भवनमा लेखिएका बोर्डमा कालो पोतेका थिए ।
‘अहिले स्थानीय तह निर्धाण गरिए अनुसार ५१ प्रतिशतभन्दा बढी जनसंख्या भएको मधेशमा ३० प्रतिशतभन्दा कम स्थानीय निकाय बनेको छ,’ संघिय समाजवादी फोरम नेपालका महोतरी जिल्ला अध्यक्ष रामनरेश रायले भने, ‘मधेशमा सुनियोजित रुपमा प्रतिनिधित्व घटाउन र विकास बजेट ३० प्रतिशत मात्र आउने गरी अहिले स्थानीय तह निर्धारित गरिएको छ यहाँको जनताले यो बद्मासी बुझेका छन जनता हाम्रो साथमा छन हामीलाई अहिलेको गाउँपालिका र नगरपालिका मान्य छैन।’
स्थानीय तहको सन्दर्भमा आफूहरूको न्यायपूर्ण राजनीतिक मागहरूलाई सरकारले सुनुवाई गर्ने छाँटकाट नदेखाएकोले यस प्रकारले विरोध जनाउन बाध्य भएको उनले बताए।
सरकारी संयन्त्र र सुरक्षा फौज लगाएर सरकारले मधेशमा बलजफ्ती चुनाव गराउन चाहे आफूहरूले कडा प्रतिवाद गर्ने तमसपाका केन्द्रीय सदस्य सुरेश पाण्डेले बताए ।
स्थानीय तह पुनःसंरचना भए लगतै जिल्ला समन्वय समिति महोत्तरी र जलेश्वर नगरपालिकामा नयाँ साइनबोर्ड छाप र लेटरप्याड प्रयोग गरेर कामकाज सूचारु गरेका थिए ।
मोर्चाले निर्वाचन अगावै संविधान संशोधन गरे मात्र आफूहरू चुनावमा भाग लिने जनाउ दिदैं निर्वाचनको विरोधमा यसअघि नै महोत्तरीमा तोकिएको १२ गाउँपालिका मध्ये अधिंकाश गाउँपालिकाको कार्यालयहरूमा तालाबन्दी गरेर कामकाज ठप्प पारिसकेका छन् ।
यता मधेसी मोर्चाको अवरोधको कारण महोत्तरीका सर्वसाधारण मर्कामा पर्दै आएका छन्।
