एमालेको विद्यार्थी संगठन अनेरास्ववियुले आफ्ना कार्यकर्तालाई 'एनसेल' प्रयोग नगर्न निर्देशन दिएको छ। आज बसेको स्थायी समिति बैठकले आफ्ना सबै कार्यकर्तालाई एनसेल प्रयोग नगर्न निर्देशन दिएको हो।
एनसेलले सरकारलाई बुझाउनु पर्ने पुँजीगत लाभ कर नबुझाएकाले यस्तो निर्देशन दिइएको संगठनका सचिव आरसी लामिछानेले सेतोपाटीलाई जानकारी दिए। साथै, संगठनले एनसेल प्रयोग नगर्न सर्वसाधारणसँग अनुरोध समेत गरेको छ।
'एनसेलले पूँजीगत लाभ कर नबुझाएको विषयमा सचेत गराउन अर्थमन्त्री र संसदको सार्वजनिक लेखा समितिलाई ज्ञापन पत्र बुझाउने निर्णय पनि भएको छ,' सचिव लामिछानेले भने, 'पचहतरै जिल्लामा विरोध प्रदर्शनको कार्यक्रम पनि बैठकले तय गरेको छ।'
टेलिफोन सेवा प्रदायक कम्पनी एनसेल खरिदब्रिकी गर्दा सरकारलाई बुझाउनु पर्ने २६ अर्ब रूपैयाF नबुझाएको भनी उक्त कम्पनीको सार्वजनिक आलोचना भइरहेको बेला अनेरास्ववियुले यस्तो निर्णय गरेको हो।
