निर्वाचन आयोगले स्थानीय निर्वाचनका लागि बिहीबारसम्म मतदान केन्द्र निर्धारण गरिसक्ने लक्ष्य राखेको छ। तर, बिहीबार दिउँसोसम्ममा ६२ वटा जिल्लाले मात्रै मतदान केन्द्र निर्धारणको गरी पठाएको छ।
बिहीबारसम्म दुई नम्बर प्रदेशमा कुनै पनि जिल्लामा मतदान केन्द्र निर्धारण हुन सकेको छैन। तर, यहाँ मतदान केन्द्र निर्धारणका लागि प्रयास भइरहेको आयोगका प्रवक्ता सुर्यप्रसाद शर्माले सेतोपाटीलाई बताए।
'दुई नम्बर प्रदेशका आठै जिल्लामा आजसम्म केन्द्र निर्धारण भइसकेको छैन,' उनले भने, 'निर्धारणको प्रयास भइरहेको छ। सिडिओ सा'बहरूले समन्वय गरिरहनु भएको छ। केही दिन भित्रमै केन्द्र निर्धारण हुन्छ।'
मधेसी मोर्चाको विरोधका कारण दुई नम्बर प्रदेशको ८ जिल्लामा निर्वाचन केन्द्र निर्धारण हुन नसकेको हो। स्थानीय तहको संख्या बढाएर मात्रै स्थानीय निर्वाचन गर्नु पर्ने मोर्चाको माग छ। मोर्चाको विरोधका कारण कतिपय गाउँपालिका र नगरपालिकाका केन्द्रले काम सुरु गर्न सकेका छैनन्। ६२ जिल्लाको प्रतिवेदन आइसकेकाले समयमै केन्द्र निर्धारण भइसक्नेमा आयोग आशावादी रहेको प्रवक्ता शर्माले बताए।
आयोगले यसवर्ष देशभरी २१ हजार जति मतदान केन्द्र हुने आंकलन गरेको थियो। तर, जिल्लाहरूबाट आएको प्रतिवदेनहरूमा धेरै केन्द्र थपिएको छैन। यसले आयोगको आंकलन भन्दा कम केन्द्र हुने संकेत गरेको प्रवक्ता शर्माले बताए। संविधान सभा निर्वाचन २०७०मा देशभर १८ हजार माथि मतदान केन्द्र थिए। यसपाली यो संख्या केही बढ्ने छ।