नेकपा एमालेले बैशाख ३१ को स्थानीय निर्वाचनमा आफूले उठाउने उम्मेद्वारको मापदण्ड बनाएको छ। बिहीबार अध्यक्ष केपी शर्मा ओलीको निवासमा बसेको स्थायी समिति बैठकले मापदण्ड बनाएको हो। सचिव योगेश भट्टराईकाअनुसार पार्टीप्रति प्रतिबद्ध, अनुशासित, लोकप्रीय र इमान्दार कार्यकर्तालाई उम्मद्वारीका लागि प्राथमिकता दिने निर्णय भएको छ।
'लोकप्रीय र जित्ने सम्भावना बलियो भएकालाई टिकट दिने निर्णय भएको छ,' उनले भने, 'अनुशाशित, लोकप्रिय र पार्टीप्रति प्रतिबद्धलाई प्राथमिकता दिइने छ।' उम्मेद्वार छनोट गर्दा वडासदस्य र वडाअध्यक्षबारे अन्तिम निर्णय गर्ने अधिकार बैठकले जिल्ला कमिटीलाई दिएको छ। गाउँपालिका अध्यक्ष र उपाध्यक्ष तथा र नगरपालिकाका मेयर उपमेयरको छनोट भने जिल्ला कमिटीको सिफारिसमा प्रदेश कमिटीले गर्ने छ।
उपमहानगर र महानगरपालिकाको मेयर तथा उपमेयरबारे भने केन्द्रीय कमिटीले नै निर्णय गर्ने सचिव भट्टराईले जानकारी दिए। बैठकले 'मेची-महाकाली राष्ट्रिय अभियान'को समिक्षा गर्दै अभियान पूर्णरूपमा सफल भएको निष्कर्ष निकालेको छ। यस्तै निर्वाचन आयोगलाई आचारसंहिता पालनामा थप ध्यान दिन आग्रह पनि गरेको छ।