संसद बाहिर रहेका राजनीतिक दलहरुले निर्वाचनमा भाग लिने वातावरण बनाउन सरकार र निर्वाचन आयोगसँग माग गरेका छन्। बाबुराम भट्टराई नेतृत्वको नयाँ शक्ति पार्टी नेपालसहित संसदमा नरहेका २४ वटा राजनीतिक दलहरुले बिहिबार काठमाडौंमा पत्रकार सम्मेलन गरी स्थानीय तहको निर्वाचनमा भाग लिने वातावरण बनाउन सरकार र निर्वाचन आयोगसँग माग गरेका हुन्।
स्थानीय तह निर्वाचन ऐनले संसदमा नरहेका दलहरुलाई दलीय हैसियतमा निर्वाचनमा भाग लिन नपाउने व्यवस्था गरेको भन्दै आपत्ति पनि जनाएका छन्। उनीहरुले निर्वाचनमा भाग लिँदै आएका राजनीतिक दलहरुलाई प्रतिबन्ध लगाउने गरी आएको स्थानीय निर्वाचन ऐन खारेज गर्न र सबै दललाई चुनाव चिन्ह प्रदान गरी निर्वाचनमा जाने वातावरण तत्काल सुनिश्चित गर्न पनि सरकार र निर्वाचन आयोगको ध्यानाकर्षण गराएका छन्।
दलीय पहिचानको आधारमा निर्वाचनमा भाग लिन पाउने वातावरण तत्काल निर्माण गर्न सरकार र निर्वाचन आयोगसँग माग गरिएको नयाँ शक्ति पार्टी, नेपालका नेता परशुराम तामाङले जानकारी दिए।
निर्वाचनमा जित्नेले राज्य चलाउने र हार्नेले पुनः जित्न पहिचानसहित जनतामा जान पाउने बहुदलीय व्यवस्थाको विश्वव्यापी मान्यता विपरित स्थानीय तह निर्वाचन ऐनमा व्यवस्था गरिएको २४ दलद्धारा जारी विज्ञप्तीमा उल्लेख गरिएको छ । संसदबाहिर रहेका सबै राजनीतिक दलहरुलाई निर्वाचन चिन्ह प्रदान गरी स्थानीय तहको निर्वाचनमा भाग लिने वातावरण तयार गर्न माग गर्नेहरुमा आम आदमी पार्टी नेपाल, किँरात खुम्बुवान लोकतान्त्रिक पार्टी, नेपाल संघीय समाजवादी पार्टी, नेपाल कम्युनिष्ट पार्टी, नेपाल समावेशी पार्टी, बहुजन समाजवादी पार्टी नेपाललगायतका जातीय तथा क्षेत्रीय पार्टीहरु पनि रहेका छन्।
भट्टराई नेतृत्वको नयाँ शक्ति पार्टी, नेपालले सबै राजनीतिक दलहरुलाई निर्वाचनमा भाग लिन नपाउने गरी आएको स्थानीय तह निर्वाचन ऐन खारेज गर्न माग गर्दै सरकार र निर्वाचन आयोगसँग यस अघि पनि माग गरेको थियो।
