प्रधानमन्त्री पुष्पकमल दाहाल ‘प्रचण्ड’ सँग संसारकै सबैभन्दा कम तौल र उचाइ भएको शिक्षकका रुपमा ‘गिनिज बुक’ मा नाम लेखाउने तयारी गरेका अर्घाखाँचीका कृष्णप्रसाद पौडेलले आज भेट गरे।
प्रधानमन्त्री ‘प्रचण्ड’ को सरकारी निवास बालुवाटारमा भेट गरी उनले ‘गिनिज बुक’ मा नाम लेखाउनका लागि सहयोग गर्न प्रधामन्त्रीसँग आग्रह गरे।
अर्घाखाँची, ठूलापोखरा–२ रोहोटेपानी निवासी पौडेलले सोही ठाउँमा रहेको भगवती निमावि ठूलापोखरा, (रोटेपानी) मा विद्यालय स्थापना गरी निरन्तर ४२ वर्षसम्म शिक्षण गरेका थिए। बाह्र किलो तौल भएका ६३ वर्षीय पौडेलको पछिल्लो पटक स्वास्थ्यमा समस्या देखिएको छ।
सो अवसरमा प्रधानमन्त्री ‘प्रचण्ड’ ले पौडेलको ‘गिनिज बुक’ मा नाम लेखाउन र उपचारका लागि सरकारले सक्दो सहयोग गर्ने प्रतिबद्धता व्यक्त गरे। रासस
