संसदमा प्रतिनिधित्व गर्ने साना १९ दलले ३ प्रतिशत थ्रेस होल्ड राख्ने राजनीतिक दलसम्बन्धि विधेयकविरुद्ध मोर्चाबन्दी सुरु गरेका छन्।
साना दलका सांसदहरुले ३ प्रतिशत थ्रेसहोल्ड राख्ने व्यवस्था संविधान, कानुन र समावेशी लोकतान्त्रिक शासन व्यवस्थाविरुद्ध रहेको उल्लेख गर्दै त्यसमा पुनर्विचार नगरे संसद बहिष्कार गर्ने चेतावनी समेत दिएका छन्।
समानुपातिक तर्फ ३ प्रतिशत मत ल्याउनैपर्ने र प्रत्यक्षतर्फ एक जना सांसद नभएको पार्टीलाई राष्ट्रिय दलको मान्यता नदिने व्यवस्थासहितको राजनीतिक दलसम्बन्धि विधेयकविरुद्ध साना दल खनिएका हुन्।
व्यवस्थापिका संसदको बुधबारको बैठकमा साना दलका नेताहरुले थ्रेस होल्ड राख्ने व्यवस्था नहटाए संसद बहिष्कार गर्न बाध्य हुने चेतावनी समेत दिएका छन । उनीहरुले विधेयकले दलमाथिको प्रतिवन्ध लगाउने नियत राखेको आरोप समेत लगाएका छन्। संसद बैठकमा विशेष समय लिएर बोल्दै नेकपा मालेका महासचिव सिपी मैनालीले थ्रेस होल्ड राख्ने व्यवस्था कहिँकतै नभएको भन्दै आपत्ति जनाए।
उनले थ्रेसहोल्ड संविधानको भावना विपरित आएको उल्लेख गर्दै त्यसमा पुनर्विचार गर्न सभामुख समक्ष आग्रह गरे। नेपाल मजदुर किसान पार्टीका नेता प्रेम सुवालले विधेयकले दलमाथि प्रतिबन्ध गराउने उद्देश्य बोकेको भन्दै आपत्ति जनाए। उनले सबै भाषा र संस्कृतिलाई समावेशी गराउने बेला ठूला दलले त्यस विपरितको व्यवस्था गर्न खोजेको भन्दै सच्याउन माग गरे।
बैठकमा राष्ट्रिय जनमोर्चाकी मिना पुन, नेपाल परिवार दलका एकनाथ ढकाल, जनमुक्ति पार्टीका शिवलाल थापा, दलित जनजाति पार्टी नेपालकी एशोदाकुमारी लामालगायतले थ्रेस होल्ड राख्ने व्यवस्थाले निर्वाचनको वातावरण समेत विथोलिने भन्दै पुनर्विचार गर्नूपर्ने आवश्यक्ता औल्याएका थिए । यता, ठूला दलले भने राजनीतिक दलहरुलाई मर्यादित र अनुशासित बनाउन पनि थ्रेस होल्डको व्यवस्था गर्नु परेको तर्क गर्दै आएका छन्।
उनीहरुले सबै राजनीतिक दलहरुलाई ठूलो दल बन्ने अवसर निर्वाचनले दिने पनि स्पष्ट पार्दै आएका छन्।
