उपप्रधानमन्त्रीद्वय कमल थापा र बिमलेन्द्र निधिबीच बरियातमा टुंगो नलागेपछि आज साँझ बस्ने भनिएको मन्त्रिपरिषदको बैठक स्थगित भएको छ। निधि र थापा दुवैले आफूलाई बरिष्ठको दावी गर्दै आएका छन्। बिहिबार सात दिने चीन भ्रमणमा जाने लागेका प्रधानमन्त्री पुष्पकमल दाहालले दुई उपप्रधानमन्त्री बिचको तनाब बढेको अवस्थामा कसलाई कार्यवाहक भन्नेमा अन्यौलमा छन्।
उपप्रधानमन्त्री तथा गृहमन्त्री बिमलेन्द्र निधिले अर्का उपप्रधानमन्त्री कमल थापालाई आफू भन्दा अघिल्लो मर्यादामा राख्ने निर्णय नसच्याए सरकार छोड्ने चेतावनीसमेत दिएका थिए।
यता थापाले आफू पहिलेको सरकारमा पनि उपप्रधानमन्त्री भइसकेकोले आफूले दोस्रो बरियता पाउनुपर्ने दाबी गर्दै आएका छन्।
प्रधानमन्त्री दाहालले आज नेपाली कांग्रेसका सभापति शेरबहादुर देउवा र कमल थापालाई छुट्टा छुट्टै भेटेर पनि निष्कर्षमा पुग्न नसकेपछि आजको बैठक स्थगित भएको हो।
सामान्य प्रचलनमा पहिले मन्त्री बनेको व्यक्तिको वरियताक्रममा माथि रहने गरे पनि माओवादी कांग्रेस सत्ता समिकरण पश्चात दुई दलबीच भएको सहमतिका आधारमा निधिभन्दा पहिले उपप्रधानमन्त्री बनिसकेका उपप्रधानमन्त्री महरालाई तेस्रो वरियतामा राखिएको थियो।
मन्त्रिपरिषद सचिवालयका एक अधिकारीले दिएको जानकारी अनुसार, यो सामान्य प्रचलनमा भन्दा पनि राजनीतिक सहमतिका आधारमा भएको व्यवस्था हो। यसको समाधान राजनीतिक नेतृत्वबीच नै सहमतिका आधारमा हुनुपर्ने ती अधिकारीले बताए।
