भूकम्पपछिको पुनर्निर्माणमा खटेका इन्जिनियरले धमाधम राजीनामा दिन थालेका छन्। राष्ट्रिय पुनर्निर्माण प्राधिकरण प्रमुख कार्यकारी अधिकृत गोविन्दराज पोखरेलका अनुसार अहिलेसम्म २०० भन्दा बढी इन्जिनियरले राजीनामा दिइसकेका छन्।
दुर्गम गाउँमा काम गर्न खटाउँदा इन्जिनियरहरुले सुरुमा जान नमान्ने र गएको केही समयमा राजीनामा दिएर जागिर छोड्ने गरेका हुन्।
शहरी विकास मन्त्रालयको केन्द्रीय आयोजना कार्यान्वयन इकाइले भूकम्पपछिको पुनर्निर्माणमा प्राविधिक सेवा दिन करिब २५ इन्जिनियर, सवइन्जिनियर र प्राविधिकलाई भूकम्प अति प्रभावित १४ जिल्लामा खटाएको थियो। पटकपटक विभिन्न माग राख्दै इन्जिनियरहरुले आन्दोलन गर्दै आएका थिए। गत पुसमा आफूलाई भत्ता दिनुपर्ने लगायतका माग राखेर आन्दोलन गरेका उनीहरुले सामुहीक राजीनामा समेत दिएका थिए। मन्त्रालयले उनीहरुको राजीनामा स्वीकृत नगरी ७५ प्रतिशतसम्म प्रोत्साहन भत्ता दिने निर्णय गरेको थियो। भत्ता बढेपछि काममा फर्केका इन्जिनियर अहिले भने धमाधम राजीनामा दिन थालेका हुन्।
दोलखामा खटाइएका इन्जिनियर सन्तोष क्षेत्रीले पैसा बढी भएपनि दुर्गममा काम गर्न कठिन हुने भएकाले इन्जिनियरहरुले राजीनामा दिएको बताए। उनी पनि राजीनामा दिएर काठमाडौं आइसकेका छन्। ‘पैसा बढी भएर के गर्नु, दुर्गममा काम गर्न कठिन हुने रैछ,’ क्षेत्रीले भने, ‘केही साथीहरुले अन्त राम्रो अवसर पाएकाले पनि जागिर छोड्नु भएको हो।’
प्राधिकरणले राजीनामा दिने इन्जिनियरको ठाउँमा नयाँ भर्ना गरिने बताएको छ। प्राधिकरणका सहप्रवक्ता भीष्मकुमार भुषालले भत्ता लगायतका सुविधा बढाएपनि इन्जिनियरले दुर्गममा काम गर्नुको साटो राजीनामा दिने क्रम बढेको बताए। ‘हामी अब नयाँ भर्ना गर्छौं, उहाँहरुलाई भत्ता पनि दिइएकै हो’, भुषालले भने, ‘सक्दिनँ भनेर छोडेर जानेलाई रोकेर त कसरी राख्नु?’
गाउँमा खटेका इन्जिनियरले घर बनाइरहेकाहरुको घरको प्राविधिक चेकजाँच भूकम्पप्रतिरोधी भए/नभएको हेरेर सेवा सल्लाह दिने गर्छन्।
