सर्वोच्च अदालतले डीआईजी जयबहादुर चन्द र नवराज सिलवालको कार्य मुल्यांकनको फाईल मगाएको तर आफ्नो नमगाएको भन्दै रिट दायर गर्न सर्वोच्च पुगेका दुई नम्बरमा रहेका डीआईजी प्रकाश अर्यालको रिट दर्ता गर्न सर्वोच्चले आज समय दिएन।
डीआईजी अर्यालले आइतबार रिट दायरको तयारी गरेर अदालत पुगेका थिए। तर आज समय अभाव भन्दै सोमबारका लागि सर्वोच्चले समय दिएको अधिवक्ता सुवास लामिछानेले जानकारी दिए।
आईजीपी नियुक्ति विवादमा सर्वोच्चमा परेको रिटको सुनुवाई गर्दै सर्वोच्चले डीआईजी बढुवा गर्दाको फाईल सबैको मगाउनुपर्ने बेला चन्द र सिलवालको मात्र मगाएको भन्दै बरियता क्रममा दुई नम्बरमा रहेका डीआईजी प्रकाश अर्यालको तर्फबाट अधिबक्ता सुवास लामिछानेले रिट लिएर गएका थिए।
अधिवक्ता आशिष ज्ञवालीले आइतबार बेलुकासम्म रिट दायरको तयारी गरे पनि अदालतले नमानको बताए। उनले सोमबार कार्यालय खुल्नासाथ रिट निवेदन दर्ता गर्ने बताए।
'हामी दिनभर बस्यौँ, तर अदालतले दर्ता गराएन,' लामिछानेले भने, 'दर्ता नगर्ने भए दरपिठ गर्न भन्यौँ, त्यो पनि गरिएन। त्यसपछि हामीले रिट बुझाएको भर्पाइ माग्यौँ, त्यो पनि दिइएन। साँझ ५ बजेसम्म हामी अदालत परिसरमै बस्यौँ, तर हाम्रो रिटबारे कुनै निर्णय भएन। यसलाई हामी भोलि पनि निरन्तरता दिन्छौँ।'
इन्सपेक्टरमा अब्बल नम्बरसहित आफू नियुक्त भएको र त्यसै अनुसार माथिल्लो पदमा पनि नियुक्त हुँदै गएकाले प्रहरी प्रमुख नियुक्तिमा आफ्नो पनि कार्यसम्पादन मूल्यांकन हुनुपर्ने अर्यालले माग गरेका छन्।
यसैबीच फागुन १ गतेको मन्त्रिपरिषद् बैठकले डिआइजी जयबहादुर चन्दलाई आइजीमा सिफारिस गरेको भन्दै अधिवक्ता कपिलदेव ढकाल चन्दको नियुक्तिविरूद्ध रिट हालेका थिए। प्रधानन्यायाधीश सुशीला कार्कीको एकल इजलासले ढकालको रिटमाथि सुनुवाइ गर्दै निर्णय कार्यान्वयन रोकेको थियो।
सरकारको सिफारिस यथास्थितिमा राख्न आदेश भएकै दिन आइजीका अर्का प्रतिस्पर्धी डिआइजी नवराज सिलवालले पनि सर्वोच्चमा रिट दायर गरेका थिए।
