निर्वाचन आयोगले राष्ट्रिय प्रजातन्त्र पार्टीको विधानबाट 'हिन्दू राष्ट्र' र 'राजसंस्था' झिक्ने निर्णय गरेको छ।
आयोगको बैठकले राप्रपा संसदीय दलको विधानबाट यी दुई शब्दावली झिक्ने निर्णय गरेको हो। संविधानसँग बाझिएकाले उक्त शब्दावली झिक्नु परेको निर्वाचन आयोगले जनाएको छ। संविधानमै नेपाल गणतन्त्रात्मक मुलुक र धर्म निरपेक्ष लेखिएकाले राजतन्त्र र कुनै अमुक धर्मको नाममा भोट माग्न नमिल्ने भन्दै आयोगले यस्तो निर्णय गरेको हो।
निर्वाचन आयोगको यो निर्णयपछि अध्यक्ष कमल थापाले सामाजिक सञ्जालमार्फत आयोगले अभिव्यक्ति स्वतन्त्रता कुन्ठित गर्न खोजेको प्रतिक्रिया दिएका छन्। उनले ट्वीटरमा लेखेका छन्, 'संविधानले विचार स्वतन्त्रता ग्यारेण्टी गरेको छ। पार्टीको विचार निषेध गर्ने अधिकार कसैलाई छैन्। विचार निषेध गर्ने भए चुनावमा भाग लिनुको औचित्य रहन्न। संविधानले हिन्दुराष्ट्र र राजसंस्थाको विचार लिएर जनतामा जान निषेध गरेको छैन। विचार स्वतन्त्रतामा बन्देज लगाउनु चुनाव हुन नदिने षडयन्त्र हो।'
उनले लेखेका छन्, 'राप्रपा संविधान र संबैधानिक व्यवस्थासँग सहकार्य गर्दै आफ्नो मान्यता स्थापित गर्ने बाटोमा हिडेको छ। कृपया संवैधानिक बाटो अवरुद्ध नगरियोस्।'
यो निर्णयको विरूद्धमा कानुनी उपचार खोज्ने उनले बताएका छन्।
