मोर्चामा आवद्ध चार दलले आज सरकारलाई दिएको समर्थन फिर्ता लिएको छ। बिहीबार सिंहदरबारस्थित समामुखको सचिवालयमा पुगेर मोर्चामा आवद्ध चार दलहरू- सद्भावना पार्टी, फोरम गणतान्त्रिक, राष्ट्रिय मधेस समाजवादी पार्टी र संघीय समाजवादी फोरम नेपालले सरकारलाई दिएको समर्थन फिर्ता लिएका हुन्। उपेन्द्र यादव नेतृत्वको संघीय समाजवादी फोरम नेपालले बुधबारै सभामुखलाई भेटेर समर्थन फिर्ता लिएको पत्र बुझाएको थियो।
मधेसी मोर्चाका तर्फबाट संसदमा ४० जना सांसद छन्।
सभामुखको अनुपस्थितिमा सचिवालयका सचिवलाई मोर्चाका नेताले पत्र बुझाएका हुन्।
पत्र बुझाएर बाहिर निस्किएका लक्ष्मणलाल कर्णले यो सरकारले मधेसको समस्या समाधान गर्न नसकेको र आफूहरू सरकारमा हुँदा हुँदै आफ्नै कार्यकर्ता मारिएकोमा आपत्तिसमेत जनाएका छन्।
उनले सरकार गठनका बेला आफूहरूसँग भएको तीन बुँदे सहमतिसमेत कार्यान्वयनमा नआएकोले बाध्य भएर सरकारलाई दिएको समर्थन फिर्ता लिनुपरेको बताए।
अब एमालेसँग सहकार्य गर्न जानु भएको हो भन्ने यसैबीच पत्रकारहरूले सोधेको प्रश्नमा उनले मधेस विरोधी रहेको एमाले सच्चिएर आए सहकार्य हुने बताए।
‘एमालेले हामीलाई र मधेसलाई धेरै अपमान गरेको छ। यदि सच्चिएर आए भने मात्र एमालेसँग सहकार्य हुन्छ।’