नेकपा एमालेका प्रमुख सचेतक भानुभक्त ढकालले एमालेको दबाबकै कारणले निर्वाचनको मिति घोषणा भएको दावी गरेका छन्। प्रमुख सचेतक ढकालले एमालेले गरेको आन्दोलनकै कारणले संविधान संशोधन गर्ननहुने भनेर जनताले थाहा पाएको बताएका छन्।
सेतोपाटीसँग कुरा गर्दै उनले भने, ‘हामीले गरेको आन्दोलनकै कारण संविधान संशोधन राष्ट्रहित विपरित छ भनेर स्थापित भयो,’ उनले भने, ‘पाँच नम्बर प्रदेशका जनता कुनै पार्टीको झण्डा नलिईकन राष्ट्रिय झण्डा लिएर आन्दोलनमा आएको हाम्रै एजेण्डाको कारण हो।’
दुई महिनासम्म एमालेले बिना कारण संसद अबरोध गर्यो भन्नु सरासर गलत भएको उनले बताए। संविधान संशोधनको बिरुद्धमा एमाले सहितका बिपक्षी नौ दल मात्र नभई सत्तापक्ष भित्रका सांसद पनि रहेको उनले दाबी गरे।
‘अहिले निर्वाचनको वातावरण पनि बन्दै गएको छ। एमालेको अडानकै कारण यो सफल भएको हो,’ उनले भने, ‘सरकारले पनि संविधान कार्यान्वयनमा चासो देखाएको छ। यसका लागि एमालेले धेरै पापड बेल्नु परेको छ।’
एमालेले राष्ट्रिय हितका पक्षमा र जनताका पक्षमा एजेण्डामा केन्द्रित रहेर मात्रै संसद अवरोध गर्ने गरेको उनले बताए।‘राष्ट्रको अस्मिता खतरामा परेको बेला हामी आन्दोलन गर्छौं। जनताको पक्षमा हुनेले यसलाई समर्थन गर्छन्। जनतको बिपक्षमा हुनेले यसको बिरोध गर्छन्,’ उनले भने, ‘एमाले छ र त आन्दोलन गर्छ।’
सरकार पनि लचिलो भएर आएकोले आफूहरुले निर्वाचनको वातावरण नबिग्रियोस भनेर संसद संचालन हुन दिएको उनले बताए। ‘दुई तिहाई पुग्न नदिने मत बिपक्षीहरुसँग सुरक्षित छ। त्यसैले यो विधेयक निर्णयार्थ पेश हुने अवस्थासँग आइपुग्दैन,’ उनले भने, ‘यो विधेयक पास हुन्न र पास हुन पनि दिदैनांै।’