प्रहरी महानिरीक्षक (आइजिपी) मा जयबहादुर चन्दलाई नियुक्त गर्ने मन्त्रिपरिषद् निर्णयविरुद्ध सर्वोच्च अदालतमा परेको रिटको सुनुवाइ मंगलबारलाई सरेको छ। बुधबार सुरु भएको बहस बिहीबार पनि नसकिएपछि अर्को साता मंगलबारलाई सरेको हो।
बिहीबार रिट निवेदक र सरकारी वकिलहरुले बहस गरे। डिआइजी नवराज सिलवालको रिट निवेदकको पक्षबाट बाबुराम कुँवर, मेघराज पोखरेल लगायतले बहस गरेका छन् भने सरकारका तर्फबाट महान्यायाधीवक्ता रमणकुमार श्रेष्ठ, दुर्गाबन्धु पोखरेल, खगराज पौडेल, रेवती त्रिपाठीले बहस गरेका छन्।
अधिवक्ता कपिलदेव ढकालले गत माघ २८ गते प्रधानमन्त्री तथा मन्त्रिपरिषद कार्यालयसमेत ५ र शेरबहादुर देउवासहित ४ जनाको नाममा सर्वोच्चमा रिट हालेका थिए। त्यसपछि फागुन १ गते डिआइजी नवराज सिलवालले प्रधानमन्त्री तथा मन्त्रिपरिषदको कार्यालयसहित ३ जनाविरुद्ध अदालतमा रिट दायर गरेका थिए।
